സ്കൂൾ തുറന്ന ദിവസംതന്നെ കുട്ടിപ്പൊലീസുകാർ ഗതാഗത നിയന്ത്രണത്തിന്​

പാപ്പിനിശ്ശേരി: സ്കൂൾ തുറന്ന ആദ്യ ദിനംതന്നെ പാപ്പിനിശ്ശേരി ഹയർ സെക്കൻഡറി വിദ്യാർഥികൾ ട്രാഫിക് നിയന്ത്രണത്തിനിറങ്ങി മാതൃകയായി. സ്കൂളിന് സമീപത്തെ കെ.എസ്.ടി.പി റോഡിൽ നടന്ന ബോധവത്കരണ ക്ലാസിന് വളപട്ടണം സി.ഐ എം.കൃഷ്ണൻ നേതൃത്വം നൽകി. ബോധവത്കരണത്തിൽ സ്റ്റുഡൻറ് പൊലീസ് കാഡറ്റുകാരോടൊപ്പം നാട്ടുകാരും അണിചേർന്നു. റോഡുപണി പൂർത്തിയായിട്ടില്ലെങ്കിലും പാപ്പിനിശ്ശേരി --പിലാത്തറ റോഡിൽ നിത്യേനയുള്ള വാഹനങ്ങളുടെ അമിതവേഗം നിരവധി ജീവനുകളാണ് തട്ടിയെടുത്തത്. കുട്ടി പൊലീസുകാരുടെ നേതൃത്വത്തിൽ റോഡിൽ വേഗത നിയന്ത്രണ ഉപകരണവും സ്ഥാപിച്ചിട്ടുണ്ട്. പ്രധാനാധ്യാപിക പി.പി. ലത, പി.ടി.എ പ്രസിഡൻറ് കെ. അനൂപ് കുമാർ, കെ. സുനിൽകുമാർ, കെ.കെ. ബാലകൃഷ്ണൻ, പി.മോഹനൻ, പി.ബി. ബിനീഷ്, പി.വി. റമീസ എന്നിവർ നേതൃത്വം നൽകി.