വേങ്ങാട് മഹല്ല്: മൂന്നു മാസത്തിനകം തെരഞ്ഞെടുപ്പ് നടത്താൻ ഉത്തരവ്

അഞ്ചരക്കണ്ടി: വർഷങ്ങളായി അധികാരതർക്കം നിലനിൽക്കുന്ന വേങ്ങാട് മഹല്ല് മുസ്ലിം ജമാഅത്ത് കമ്മിറ്റിയിലേക്ക് മൂന്നു മാസത്തിനകം തെരഞ്ഞെടുപ്പ് നടത്താൻ വഖഫ് ബോർഡ് ഉത്തരവിട്ടു. വേങ്ങാട് മഹല്ല് ഓർഗനൈസേഷ​െൻറ പിന്തുണയോടെ പി. മുഹമ്മദ് ഫായിസ് 2017 മാർച്ച് 29ന് ഹൈകോടതി മുമ്പാകെ ഫയൽ ചെയ്ത ഹരജിയിൽ നാലു മാസത്തിനകം തെരഞ്ഞെടുപ്പ് നടത്താൻ ഉത്തരവായിരുന്നതാണ്. ഈ സമയം സമസ്ത കണ്ണൂർ ജില്ല നേതൃത്വം മധ്യസ്ഥചർച്ച നടത്തിയിരുന്നു. എന്നാൽ, നിയമപോരാട്ടത്തിൽനിന്ന് ആരുംതന്നെ പിന്മാറാത്ത സാഹചര്യത്തിൽ സമസ്ത നേതൃത്വം ചർച്ചകളിൽനിന്ന് പിന്മാറി. തുടർന്ന് ഹൈകോടതി മുമ്പാകെ വഖഫ് ബോർഡിനെ പ്രതിസ്ഥാനത്ത് നിർത്തി കോടതിയലക്ഷ്യ ഹരജി ഫയൽ ചെയ്തു. ഇതി​െൻറ തുടർച്ചയെന്നോണം തെരഞ്ഞെടുപ്പ് നടത്തുന്നതിന് റിട്ടേണിങ് ഓഫിസറായി അഡ്വ. എ. അബ്ദുൽ അസീസ് എന്നവരെ ചുമതലപ്പെടുത്തി. വഖഫ് ബോർഡി​െൻറ നിയമാവലിപ്രകാരമുള്ള നടപടിക്രമങ്ങൾ പാലിച്ച് മൂന്നു മാസത്തിനകം തെരഞ്ഞെടുപ്പ് നടത്തി റിപ്പോർട്ട് സമർപ്പിക്കാനാണ് ആവശ്യപ്പെട്ടിരിക്കുന്നത്. പ്രാഥമിക ചെലവുകൾക്കായി 10,000 രൂപയും അനുവദിച്ചിട്ടുണ്ട്. നേരത്തേ സുന്നികളുടെ പ്രഖ്യാപിതനിലപാടിന് വിരുദ്ധമായി മഹല്ലിലെ മൂന്നു വനിതകൾ വോട്ടവകാശത്തിനായി ഹൈകോടതിയിലെത്തിയിരുന്നു. എന്നാൽ, ഹരജി കോടതി തള്ളുകയായിരുന്നു.