കുറുമാത്തൂർ പഞ്ചായത്തിൽ തൈകൾ വിതരണത്തിനൊരുങ്ങി

തളിപ്പറമ്പ്: കുറുമാത്തൂർ പഞ്ചായത്തിനെ പച്ചപ്പ് പുതപ്പിക്കാൻ ഫലവൃക്ഷത്തൈകൾ വിതരണത്തിന് ഒരുങ്ങി. പരിസ്ഥിതി ദിനത്തിൽ വിതരണം ചെയ്യാനാണ് 31,000ത്തോളം തൈകൾ ഒരുക്കിയത്. കരിമ്പം ഇ.ടി.സി വയലിലാണ് തൈകൾ പാക്കറ്റിൽ പാകി മുളപ്പിച്ചത്. 21 തൊഴിലുറപ്പ് തൊഴിലാളികൾ ഫെബ്രുവരി 27നാണ് തൈകളുടെ ഉൽപാദനം തുടങ്ങിയത്. ഗാർഡൻ നെറ്റ് പാകി തണലൊരുക്കിയും വെള്ളമൊഴിച്ചും വളർത്തിയ തൈകൾ പഞ്ചായത്തിലെ മുഴുവൻ വാർഡുകളിലും വിതരണം ചെയ്യും. 500 മുരിങ്ങ തൈകൾ, 2500 പേര തൈകൾ, 11,000 നെല്ലി, 6500 സീതപ്പഴം, 10,640 കായൽ മുള തൈകൾ എന്നിവയാണ് ഒരുക്കിയത്. പഞ്ചായത്തി​െൻറ ഹരിതതീരം പദ്ധതി പ്രകാരം പുഴയോരത്ത് നട്ടുപിടിപ്പിക്കാനാണ് മുള തൈകൾ തയാറാക്കിയത്. സ്കൂൾ വിദ്യാർഥികൾ, കുടുംബശ്രീ പ്രവർത്തകർ, മറ്റ് സന്നദ്ധ സംഘടന പ്രവർത്തകർ എന്നിവർ മുഖേന തൈകൾ നട്ടുപിടിപ്പിച്ച് പഞ്ചായത്തിനെ ഹരിതാഭമാക്കാനും പുഴയോരത്ത് മുള നട്ടുപിടിപ്പിച്ച് മണ്ണൊലിപ്പ് തടയാനുമാണ് ലക്ഷ്യമിടുന്നത്.