കനത്ത മഴയിൽ വീടുകൾ തകർന്നു

പാപ്പിനിശ്ശേരി: കനത്ത മഴയിൽ അരോളി പുലക്കറവയൽ റോഡിലെ പി.വി. ശാന്തയുടെ വീട് തകർന്നു. ചൊവ്വാഴ്ച പുലർച്ചയാണ് അപകടം. ഓട് മേഞ്ഞ വീടി​െൻറ മേൽക്കൂര മുഴുവനായും ഉഗ്രശബ്ദത്തോടെയാണ് തകർന്നത്. ഉറങ്ങുകയായിരുന്ന ശാന്തയും ഭർത്താവ് നാരായണനും വീട് തകർന്നുവീഴുന്ന ശബ്ദം കേട്ട് പുറത്തേക്ക് ഓടിയതിനാൽ പരിക്കേൽക്കാതെ രക്ഷപ്പെട്ടു. അരോളി അരയാലയിലെ തിക്കൽ ലീലയുടെ വീട് മരം വീണ് തകർന്നു. വീട്ടിലുണ്ടായിരുന്ന കുടുംബം അദ്ഭുതകരമായാണ് രക്ഷപ്പെട്ടത്. മേൽക്കൂര തകർന്നതിനാൽ വീട് വാസയോഗ്യമല്ലാതായി.