കണിച്ചാറിൽ കടകളിലെ കാമറകൾ മോഷ്​ടിച്ചു

കണിച്ചാർ: മലയോരത്ത് മോഷണ പരമ്പര തുടരുന്നു. കണിച്ചാറിൽ കടകളിൽ സ്ഥാപിച്ച സി.സി.ടി.വി കാമറകളാണ് മോഷ്ടിച്ചത്. ടൗണിലെ കൈലാസം സ്റ്റോർ, കാട്ടുമാടം ടൈൽസ് എന്നീ കടകൾക്ക് മുന്നിലെ രണ്ട് കാമറകളാണ് മോഷ്ടിച്ചത്. ഒരെണ്ണം നശിപ്പിക്കുകയും ചെയ്തിട്ടുണ്ട്. കടയുടമകൾ കേളകം പൊലീസിൽ പരാതി നൽകി. കഴിഞ്ഞ ദിവസം മണത്തണയിലും സി.സി.ടി.വി കാമറ മോഷ്ടിച്ചിരുന്നു. മണത്തണയിലും കേളകം ടൗൺ മേഖലയിലെ ആരാധനാലയങ്ങളിലും കഴിഞ്ഞ ദിവസങ്ങളിൽ കവർച്ച നടന്നിരുന്നു. സംഭവങ്ങളിൽ പൊലീസ് അന്വേഷണം തുടരുകയാണ്.