അഴിയൂർ പി.എച്ച്.സി ഇനി കുടുംബാരോഗ്യ കേന്ദ്രം

മാഹി: അഴിയൂര്‍ പ്രാഥമികാരോഗ്യ കേന്ദ്രത്തെ ആര്‍ദ്രം പദ്ധതിയില്‍ ഉള്‍പ്പെടുത്തി കുടുംബാരോഗ്യ കേന്ദ്രമാക്കി ഉയര്‍ത്തി സര്‍ക്കാര്‍ ഉത്തരവിറക്കി. ഇതോടെ മൂന്നു ഡോക്ടര്‍മാരുടെ സേവനവും ലാബ് സൗകര്യവും ഇവിടെ ഒരുക്കും. ഇതോടൊപ്പം ജനപങ്കാളിത്തത്തോടെ വിവിധ വികസന പ്രവൃത്തികള്‍ നടത്താന്‍ ആരോഗ്യ കേന്ദ്രം വികസന സമിതി യോഗം തീരുമാനിച്ചു. പഞ്ചായത്ത് പ്രസിഡൻറ് ഇ.ടി. അയ്യൂബ് അധ്യക്ഷത വഹിച്ചു. മെഡിക്കല്‍ ഓഫിസര്‍ ഡോ. കെ.കെ. അബ്ദുൽ നസീര്‍, പി.രാഘവന്‍, പി.എം. അശോകൻ, പ്രദീപ്‌ ചോമ്പാല, പി. ശ്രീധരന്‍, കെ. അന്‍വര്‍ഹാജി, ജാസ്മിന കല്ലേരി, ശുഭ മുരളീധരൻ, കെ.എ. സുരേന്ദ്രൻ, ആര്‍.പി. അഹമ്മദ് ഹാജി എന്നിവര്‍ സംസാരിച്ചു.