വിളക്കന്നൂരിൽ ഒമ്പത്​ സി.പി.എം കൊടിമരങ്ങൾ നശിപ്പിച്ചു

ശ്രീകണ്ഠപുരം: ചുഴലി വിളക്കന്നൂരിൽ സി.പി.എമ്മി​െൻറ ഒമ്പതു കൊടിയും കൊടിമരങ്ങളും പിഴുതെടുത്ത് തോട്ടിൽ തള്ളി. കഴിഞ്ഞദിവസം രാത്രിയാണ് വിളക്കന്നൂരിലും പരിസരങ്ങളിലും സ്ഥാപിച്ച ഇരുമ്പുപൈപ്പിലുള്ള കൊടിമരങ്ങൾ നശിപ്പിച്ചത്. സി.പി.എം നൽകിയ പരാതിയിൽ ശ്രീകണ്ഠപുരം എസ്.ഐ ഇ. നാരായണൻ നടത്തിയ അന്വേഷണത്തിൽ വിളക്കന്നൂരിലെ തോട്ടിൽനിന്ന് അഞ്ചു കൊടിമരങ്ങൾ കണ്ടെടുത്തു. നാലെണ്ണം കണ്ടെത്താനായില്ല. പ്രദേശത്ത് സംഘർഷം സൃഷ്ടിക്കാൻ മുസ്ലിം ലീഗുകാരാണ് കൊടിമരം നശിപ്പിച്ചതെന്ന് സി.പി.എം ചുഴലി ലോക്കൽ സെക്രട്ടറി പി. പ്രകാശൻ ആരോപിച്ചു. വിളക്കന്നൂർ, നടുവിൽ മേഖലകളിൽ കഴിഞ്ഞ മാസം ലീഗ്-സി.പി.എം സംഘർഷം അരങ്ങേറിയിരുന്നു. ഇതി​െൻറ തുടർച്ചയായാണ് കൊടിമരം നശിപ്പിക്കലുമെന്നാണ് കരുതുന്നത്.