വാതക ശ്മശാനവും പ്ലാസ്​റ്റിക് സംസ്കരണ കേന്ദ്രവും: പ്രതിഷേധ മാർച്ച്​ നടത്തും

കാടാച്ചിറ: കോട്ടൂർ കരിപ്പാച്ചാൽ കുന്നിൻമുകളിൽ വാതകശ്മശാനവും പ്ലാസ്റ്റിക് സംസ്കരണ കേന്ദ്രവും നിർമിക്കുന്നതിനെതിരെ ജനകീയ പ്രതിഷേധ കൂട്ടായ്മയുടെ നേതൃത്വത്തിൽ കടമ്പൂർ പഞ്ചായത്ത് ഓഫിസിലേക്ക് 17ന് മാർച്ച് നടത്തും. നേരത്തെ പത്തിന് നിശ്ചയിച്ച മാർച്ചാണ് 17ലേക്ക് മാറ്റിയത്. ജനകീയ അഭിപ്രായം സ്വരൂപിക്കുന്നതിനായി പഞ്ചായത്തിലെ വിവിധ വീടുകളിൽ ഗൃഹസന്ദർശനം നടത്തി ലഘുലേഖ വിതരണം ചെയ്യുന്നതിനാണ് മാർച്ച് 17ലേക്ക് മാറ്റിയത്. ശനിയാഴ്ച വൈകീട്ട് അഞ്ചിന് യൂത്ത് കോൺഗ്രസ് മണ്ഡലം കമ്മിറ്റി സംഘടിപ്പിക്കുന്ന രാഷ്ട്രീയ വിശദീകരണ പൊതുയോഗം കാടാച്ചിറ ഡോക്ടർമുക്കിൽ നടക്കും. ഡി.സി.സി ജനറൽ സെക്രട്ടറി കെ.സി. മുഹമ്മദ് ഫൈസൽ ഉദ്ഘാടനം ചെയ്യും. വാതകശ്മശാനവും സംസ്കരണ കേന്ദ്രവും സ്ഥാപിക്കുന്നതിനെതിരെ സമരം നടത്തുന്നവരെ വികസന വിരോധികളായി ചിത്രീകരിക്കുന്ന പഞ്ചായത്ത് പ്രസിഡൻറി​െൻറ നിലപാടിനെതിരെ യൂത്ത് കോൺഗ്രസ് കടമ്പൂർ മണ്ഡലം കമ്മിറ്റി പ്രതിഷേധിച്ചു. കരിപ്പാച്ചാൽ കുന്നിന് ചുറ്റുമായി താമസിക്കുന്ന സി.പി.എം അനുഭാവികളുടെ കുടുംബം ഉൾെപ്പടെയാണ് സമരരംഗത്തുള്ളത്. ഇവർ ഉൾെപ്പടെയുള്ളവരെയാണ് വികസന വിരോധികളായി ചിത്രീകരിക്കുന്നതെന്നും മണ്ഡലം കമ്മിറ്റി ആരോപിച്ചു. പ്രസിഡൻറ് റിജിൻ രാജ് അധ്യക്ഷത വഹിച്ചു. ജിതീഷ് നമ്പ്യാർ, ഹഫ്സീർ പുല്ലാഞ്ഞി, അദീപ് തന്നട, സനി കാടാച്ചിറ, കെ.വി. അഗീഷ്, വി.കെ. റഫീഖ് തുടങ്ങിയവർ സംസാരിച്ചു.