നൗഷാദ് വധശ്രമം: പ്രധാന പ്രതി അറസ്​റ്റിൽ

പാനൂർ: സി.പി.എം പുത്തൂർ ലോക്കൽ കമ്മിറ്റിയംഗം ചെണ്ടയാട് കുനുമ്മൽ കെ. നൗഷാദിനെയും (45) സി.പി.എം പ്രവർത്തകനായ പൂളാണ്ടി നൗഫലിനെയും (40)വെട്ടി ക്കൊലപ്പെടുത്താൻ ശ്രമിച്ച കേസിൽ പ്രധാന പ്രതിയെ പൊലീസ് അറസ്റ്റു ചെയ്തു. മുത്താറിപ്പീടികയിൽ തുണ്ടിയിൽ ഷാജിയെയാണ് (39) പാനൂർ സി.െഎ വി.വി. ബെന്നിയുടെ നേതൃത്വത്തിൽ അറസ്റ്റ് ചെയ്തത്. ഒളിവിലായിരുന്ന ഷാജി മുത്താറിപ്പീടികയിൽ എത്തിയിട്ടുണ്ടെന്ന രഹസ്യവിവരത്തെ തുടർന്നുള്ള തിരച്ചിലിൽ വെള്ളിയാഴ്ച വൈകീട്ട് വീട്ടിൽ വെച്ചാണ് ഇയാളെ പിടികൂടിയത്. ശനിയാഴ്ച കോടതിയിൽ ഹാജരാക്കും. കേസിൽ 17 വയസ്സുകാരൻ ഉൾപ്പെടെ ഏഴ് ആർ.എസ്.എസ് പ്രവർത്തകരെ പൊലീസ് അറസ്റ്റ് ചെയ്തിട്ടുണ്ട്. ഡിസംബർ അഞ്ചിന് രാത്രി 10 മണിയോടെ കുനുമ്മൽ കനാൽ പരിസരത്തുവെച്ചാണ് നൗഷാദിനെയും നൗഫലിനെയും വെട്ടിക്കൊലപ്പെടുത്താൻ ശ്രമിച്ചത്. ഗുരുതര പരിക്കേറ്റ രണ്ടുപേരും ഇപ്പോഴും ചികിത്സയിലാണ്.