ബസിൽ കവർച്ച; തമിഴ്നാട് സ്വദേശിനി പിടിയിൽ

പയ്യന്നൂർ: ബസിൽ യാത്രക്കാരിയുടെ മാലപൊട്ടിച്ച് കടന്നുകളയാൻ ശ്രമിച്ച തമിഴ്നാട് സ്വദേശിനി പിടിയിൽ. തമിഴ്നാട് തിരുെനൽവേലിയിലെ മീനാക്ഷിയെയാണ് (20) ബസ് ജീവനക്കാരും യാത്രക്കാരും ചേർന്ന് പിടികൂടി പൊലീസിൽ ഏൽപിച്ചത്. ബുധനാഴ്ച രാവിലെ 9.40ഓടെ പയ്യന്നൂർ പഴയ ബസ്സ്റ്റാൻഡിലാണ് സംഭവം. എടാട്ടുനിന്ന് പയ്യന്നൂരിലെ വസ്ത്രവ്യാപാര സ്ഥാപനത്തിലേക്ക് ജോലിക്ക് വരുകയായിരുന്ന പി.വി. ബാവക്കുട്ടിയുടെ (52) രണ്ടുപവൻ മാലയാണ് സ്വകാര്യ ബസിൽനിന്ന് പൊട്ടിച്ച് കടന്നുകളയാൻ ശ്രമിച്ചത്. ഇതുകണ്ട ബസ് ജീവനക്കാരും യാത്രക്കാരും കൈയോടെ പിടികൂടി പയ്യന്നൂർ പൊലീസിന് കൈമാറുകയായിരുന്നു. സംഘത്തിൽ മറ്റ് രണ്ടുപേർകൂടി ഉണ്ടായതായും ഇവർ രക്ഷപ്പെട്ടതായും പ്രതി പറഞ്ഞു. പ്രതിയെ പയ്യന്നൂർ ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതി രണ്ടാഴ്ചത്തേക്ക് റിമാൻഡ് ചെയ്തു.