ബി ഡിവിഷൻ ലീഗ്​ ക്രിക്കറ്റ്:​ കണ്ണൂർ യങ്സ്​റ്റേഴ്സിനും തലശ്ശേരി ടൗൺ ക്രിക്കറ്റ് ക്ലബിനും ജയം

തലശ്ശേരി: കണ്ണൂർ ജില്ല ബി ഡിവിഷൻ ലീഗ് ക്രിക്കറ്റിൽ കണ്ണൂർ യങ്സ്റ്റേഴ്സ് ക്രിക്കറ്റ് ക്ലബ് എട്ടു വിക്കറ്റിന് തിരുവങ്ങാട് ഫിനിക്സ് ക്രിക്കറ്റ് ക്ലബിനെ പരാജയപ്പെടുത്തി. ആദ്യം ബാറ്റ് ചെയ്ത ഫിനിക്സ് ക്രിക്കറ്റ് ക്ലബ് 22.5 ഓവറിൽ 158 റൺസിന് എല്ലാവരും പുറത്തായി. മറുപടിയായി യങ്സ്റ്റേഴ്സ് ക്രിക്കറ്റ് ക്ലബ് 23.5 ഓവറിൽ രണ്ടു വിക്കറ്റ് നഷ്ടത്തിൽ വിജയലക്ഷ്യം നേടി. അഞ്ചു വിക്കറ്റും പുറത്താകാതെ 40 റൺസുമെടുത്ത യങ്സ്റ്റേഴ്സ് ക്രിക്കറ്റ് ക്ലബ് ക്യാപ്റ്റൻ പി. ബിനോയ് മികച്ച കളിക്കാരനായി. രണ്ടാം മത്സരത്തിൽ തലശ്ശേരി ടൗൺ ക്രിക്കറ്റ് ക്ലബ് 103 റൺസിന് തലശ്ശേരി മാസോയെ പരാജയപ്പെടുത്തി. ആദ്യം ബാറ്റ് ചെയ്ത ടൗൺ ക്രിക്കറ്റ് ക്ലബ് നിശ്ചിത 25 ഓവറിൽ നാലു വിക്കറ്റ് നഷ്ടത്തിൽ 219 റൺസെടുത്തു. മറുപടിയായി മാസോ 22.2 ഓവറിൽ 116 റൺസിന് എല്ലാവരും പുറത്തായി. 113 റൺസ് നേടി ടൗൺ ക്രിക്കറ്റ് ക്ലബ് താരം അസീം അഷ്റഫ് കളിയിലെ താരമായി. വെള്ളിയാഴ്ചത്തെ മത്സരത്തോടെ ഗ്രൂപ് എയിൽനിന്ന് കൂത്തുപറമ്പ് രഞ്ജി ക്രിക്കറ്റ് ക്ലബും ചേറ്റംകുന്ന് കോസ്മോസ് ക്രിക്കറ്റ് ക്ലബും സെമിയിൽ പ്രവേശിച്ചു.