മാണിയെ ക്ഷണിക്കാനുള്ള അവകാശം സി.പി.എമ്മിനുണ്ട്​ ^ഉമ്മൻ ചാണ്ടി

മാണിയെ ക്ഷണിക്കാനുള്ള അവകാശം സി.പി.എമ്മിനുണ്ട് -ഉമ്മൻ ചാണ്ടി കാസർകോട്: കെ.എം. മാണിയെ ഇടതു മുന്നണിയിലേക്ക് ക്ഷണിക്കാനുള്ള അവകാശം മാർക്സിസ്റ്റ് പാർട്ടിക്കുണ്ടെന്ന് മുൻ മുഖ്യമന്ത്രി ഉമ്മൻ ചാണ്ടി. കാസർകോട്ട് മാധ്യമപ്രവർത്തകരുടെ ചോദ്യങ്ങളോട് പ്രതികരിക്കുകയായിരുന്നു അദ്ദേഹം. ഇക്കാര്യത്തിൽ യു.ഡി.എഫിന് അന്നും ഇന്നും ഒരേ നിലപാടാണെന്നും ഉമ്മൻ ചാണ്ടി വ്യക്തമാക്കി. ക്ഷണിച്ചാൽ പോണോ വേണ്ടയോ എന്ന് തീരുമാനിക്കേണ്ടത് മാണിസാറാണ്. അദ്ദേഹത്തിനെതിരെ സമരം നടത്തിയതും നിയമസഭയിൽ ബജറ്റ് അവതരിപ്പിക്കുന്നത് തടയാൻ ശ്രമിച്ചതും മാർക്സിസ്റ്റ് പാർട്ടിയാണ്. അവർ അന്ന് എന്താണോ കാരണം പറഞ്ഞത് അതൊന്നും ശരിയല്ലെന്ന് തങ്ങൾ അന്നും ഇന്നും വിശ്വസിക്കുന്നു. ഇക്കാര്യത്തിൽ നിലപാടു മാറ്റം വന്നത് മാർക്സിസ്റ്റ് പാർട്ടിക്കാണ്. അത് എന്തുകൊണ്ടാണെന്ന് ചിന്തിക്കണമെന്നും അദ്ദേഹം പറഞ്ഞു.