ചൈനീസ്​ പടക്കപ്പലുകൾ ഇന്ത്യൻ മഹാസമുദ്രത്തിലേക്ക്​ നീങ്ങിയതായി റിപ്പോർട്ട്

ഷാങ്ഹായ്: മാലദ്വീപിലെ രാഷ്ട്രീയ പ്രതിസന്ധികൾക്കിടെ, ഇൗ മാസം പതിനൊന്ന് ചൈനീസ് പടക്കപ്പലുകൾ ഇന്ത്യൻ മഹാസമുദ്രത്തിലേക്ക് തിരിച്ചതായി ചൈനീസ് വാർത്ത വെബ്സൈറ്റ് റിപ്പോർട്ട് ചെയ്തു. സർവ യുദ്ധസന്നാഹങ്ങളുമായാണ് കപ്പലുകൾ നീങ്ങിയത്. എത്രകാലത്തേക്കാണ് കപ്പലുകൾ നിലയുറപ്പിച്ചത് എന്നത് റിപ്പോർട്ടിലില്ല. ഇതിനോട് ചൈനീസ് പ്രതിരോധ വിഭാഗം പ്രതികരിച്ചിട്ടുമില്ല. അബ്ദുല്ല യമീൻ മാലദ്വീപിൽ അധികാരമേറ്റശേഷം ചൈനയുമായി അടുക്കുന്നത് ഇന്ത്യയെ ചൊടിപ്പിച്ചിരുന്നു. കിഴക്കൻ ഇന്ത്യൻ മഹാസമുദ്രത്തിൽ പരിശീലനം നടക്കുന്ന ചിത്രം കഴിഞ്ഞ ദിവസം ചൈനയുടെ പീപ്പിൾസ് ലിബറേഷൻ ആർമി സാമൂഹിക മാധ്യമത്തിലെ അവരുടെ അക്കൗണ്ടിൽ പോസ്റ്റ് ചെയ്തിട്ടുണ്ട്.