ഡിജിറ്റൽ ബോധവത്​കരണ യാത്ര

കണ്ണൂർ: ഡിജിറ്റൽ സാങ്കേതികവിദ്യയെക്കുറിച്ച് സമൂഹത്തിൽ കൂടുതൽ അവബോധം സൃഷ്ടിക്കുകയെന്ന ലക്ഷ്യത്തോടെ പി.എൻ. പണിക്കർ ഫൗണ്ടേഷ​െൻറ നേതൃത്വത്തിൽ നടക്കുന്ന എക്കോ ഡിജിറ്റൽ ജൻ വിജ്ഞാൻ വികാസ് യാത്ര ഫെബ്രുവരി 25, 26 തീയതികളിൽ ജില്ലയിലെ 10 ഗ്രാമപഞ്ചായത്തുകളിൽ പര്യടനം നടത്തും. 25ന് രാവിലെ ഒമ്പതു മണിക്ക് ധർമടത്തുനിന്നാണ് യാത്ര ആരംഭിക്കുക. തുടർന്ന് ചിറക്കൽ (11 മണി), കൊളച്ചേരി (12.30), വളപട്ടണം (3 മണി), പാപ്പിനിശ്ശേരി (4.30) എന്നീ ഗ്രാമപഞ്ചായത്തുകളിൽ പര്യടനം നടത്തും. 26ന് മാടായി (രാവിലെ 9 മണി), കല്യാശ്ശേരി (11 മണി), പരിയാരം (12.30), ചെറുതാഴം (3 മണി) എന്നീ ഗ്രാമ പഞ്ചായത്തുകളിൽ പര്യടനം നടത്തിയ ശേഷം വൈകീട്ട് 4.30ന് കരിവെള്ളൂർ--പെരളം പഞ്ചായത്തിൽ സമാപിക്കും. ഇതുമായി ബന്ധപ്പെട്ട കാര്യങ്ങൾ ചർച്ച ചെയ്യുന്നതിന് ജില്ല പഞ്ചായത്ത് മിനി കോൺഫറൻസ് ഹാളിൽ ചേർന്ന സംഘാടക സമിതി യോഗത്തിൽ ജില്ല പഞ്ചായത്ത് പ്രസിഡൻറ് കെ.വി. സുമേഷ് അധ്യക്ഷത വഹിച്ചു. എ.ഡി.എം ഇ. മുഹമ്മദ് യൂസുഫ്, ഡി.ഡി.പി കെ. സുധാകരൻ, കൊളച്ചേരി പഞ്ചായത്ത് പ്രസിഡൻറ് കെ.എം.പി. സറീന, പി.എൻ. പണിക്കർ ഫൗണ്ടേഷൻ പ്രതിനിധികളായ കാരയിൽ സുകുമാരൻ, സി.വി. രാജഗോപാലൻ എന്നിവർ സംബന്ധിച്ചു.