വൈസ്​ അഡ്​മിറൽ ആർ.ബി. പണ്ഡിറ്റ്​ ഏഴിമല നാവിക അക്കാദമി കമാൻഡൻറ്​

ഏഴിമല: ഏഴിമല നാവിക അക്കാദമി കമാന്‍ഡൻറായി വൈസ് അഡ്മിറല്‍ ആര്‍.ബി. പണ്ഡിറ്റ് ചുമതലയേറ്റു. വൈസ് അഡ്മിറല്‍ എസ്.വി. ബൊക്കാറെ ആർ.ബി. പണ്ഡിറ്റിന് ചുമതല കൈമാറി. 15 മാസത്തെ സേവനത്തിനുശേഷമാണ് വൈസ് അഡ്മിറല്‍ എസ്.വി. ബൊക്കാറെ സ്ഥാനമൊഴിയുന്നത്. െഎ.എൻ.എസ് നിര്‍ഘഡ്, െഎ.എൻ.എസ് വിന്ധ്യഗിരി, െഎ.എൻ.എസ് ജല്‍ഷ്വ, മിസൈല്‍ വാഹിനി സ്‌ക്വാഡ്രണ്‍ എന്നിവയുടെ ഫ്ലാഗ് ഓഫിസറായും ആര്‍.ബി. പണ്ഡിറ്റ് സേവനമനുഷ്ഠിച്ചിരുന്നു. നാഷനല്‍ ഡിഫന്‍സ് അക്കാദമി, ഡിഫന്‍സ് സ്റ്റാഫ് കോളജ് വെലിങ്ടൺ, ലണ്ടനിലെ റോയല്‍ കോളജ് ഓഫ് ഡിഫന്‍സ് സ്റ്റഡീസ് എന്നിവിടങ്ങളില്‍ പരിശീലനം നേടിയിട്ടുണ്ട്. പാകിസ്താനില്‍ ഇന്ത്യയുടെ നേവല്‍ അഡ്വൈസര്‍ ഹൈകമീഷന്‍, ഫോറിന്‍ കോഓപറേഷന്‍ ആന്‍ഡ് ഇൻറലിജന്‍സ് എന്നീ തസ്തികകളിലും പ്രവര്‍ത്തിച്ചിരുന്നു. ഏഴിമല നാവിക അക്കാദമിയുടെ ആറാമത്തെ കമാന്‍ഡൻറായാണ് ആര്‍.ബി. പണ്ഡിറ്റ് ചുമതലയേറ്റത്.