പ്രിൻസിപ്പലി​െൻറ ആത്മഹത്യയിൽ നടപടി വേണം

പയ്യന്നൂർ: കൊല്ലം അഷ്ടമുടി ഗവ. ഹയർസെക്കൻഡറി സ്കൂൾ പ്രിൻസിപ്പൽ എസ്. ശ്രീദേവിയുടെ ആത്മഹത്യക്ക് കാരണമായ സാഹചര്യങ്ങളെക്കുറിച്ച് അന്വേഷിച്ച് കുറ്റവാളികളെ അറസ്റ്റ്ചെയ്യണമെന്ന് പ്രോഗ്രസിവ് ടീച്ചേഴ്സ് ഫോറം സംസ്ഥാന കമ്മിറ്റി യോഗം ആവശ്യപ്പെട്ടു. ക്ലാസിലിരുന്ന് ആൺകുട്ടികളും പെൺകുട്ടികളും മദ്യപിച്ചത് ചോദ്യംചെയ്ത പ്രിൻസിപ്പലിനെ ചില രക്ഷിതാക്കൾ കള്ളക്കേസിൽ കുടുക്കിയതാണ് ആത്മഹത്യക്ക് കാരണമെന്ന് പറയുന്നു. വിദ്യാർഥികളെ നേർവഴിക്ക് നയിക്കാനുള്ള സ്വാതന്ത്ര്യമാണ് ഇതിലൂടെ നഷ്ടമാകുന്നതെന്ന് യോഗം കുറ്റപ്പെടുത്തി. എം.വി. തങ്കച്ചൻ അധ്യക്ഷതവഹിച്ചു. കെ. രാജൻ, വി.ഇ. കുഞ്ഞനന്തൻ, പി. മുരളീധരൻ എന്നിവർ സംസാരിച്ചു.