ആയിപ്പുഴ മേഖലയിൽ മഞ്ഞപ്പിത്തം വ്യാപകമാകുന്നു

ഇരിക്കൂർ: കൂടാളി പഞ്ചായത്തിലെ ആയിപ്പുഴ, കൂരാരി, മരമില്ല്, പട്ടാന്നൂർ പ്രദേശങ്ങളിൽ മഞ്ഞപ്പിത്തം വ്യാപകമാവുന്നു. കിണറുകളിലും മറ്റു ജലസ്രോതസ്സുകളിലും വെള്ളം വറ്റിത്തുടങ്ങിയതോടെ ശുദ്ധജലം കിട്ടാത്ത അവസ്ഥയും ഈ ഭാഗങ്ങളിലുണ്ട്. കൂടാതെ വിവാഹ വീടുകളിലും ഗൃഹപ്രവേശ ആഘോഷ പരിപാടികളിലും ഐസിട്ട വെള്ളം കുടിക്കുന്നതിലൂടെയും മഞ്ഞപ്പിത്തം പടരുന്നതായി ആരോഗ്യവകുപ്പ് അധികൃതർ പറയുന്നു. അശുദ്ധജലം ഉപയോഗിച്ചുണ്ടാക്കുന്ന ഐസാണ് ഈ മേഖലകളിൽ ഉപയോഗിക്കുന്നത്. മഞ്ഞപ്പിത്തം കൂടുതലായി പിടിപെട്ടിരിക്കുന്നത് കുട്ടികൾക്കാണ്. രോഗം തടയുന്നതിന് അധികൃതർ ആവശ്യമായ നടപടികൾ സ്വീകരിക്കണമെന്ന് ആയിപ്പുഴ എ.സി.എ കമ്മിറ്റി പഞ്ചായത്ത്, ആരോഗ്യ അധികൃതരോട് ആവശ്യപ്പെട്ടു. കെ.വി. മാമു അധ്യക്ഷതവഹിച്ചു.