പാലക്കുന്ന്​^ആറാട്ടുകടവ്​ റോഡ്​ തകർന്നു; വാഹനഗതാഗതത്തിന്​ തടസ്സം

പാലക്കുന്ന്-ആറാട്ടുകടവ് റോഡ് തകർന്നു; വാഹനഗതാഗതത്തിന് തടസ്സം പാലക്കുന്ന്: കോട്ടിക്കുളം റെയിൽവേ ഗേറ്റ് മുതൽ ആറാട്ടുകടവ് വരെയുള്ള പഞ്ചായത്ത് റോഡ് പൊട്ടിപ്പൊളിഞ്ഞ് വാഹനഗതാഗതം തടസ്സപ്പെടുന്നു. വർഷങ്ങൾക്കുമുമ്പ് ടാറിങ് ചെയ്ത റോഡിന് പിന്നീട് കാര്യമായ അറ്റകുറ്റപ്പണികളൊന്നും നടത്തിയിട്ടില്ല. പാലക്കുന്നിൽനിന്ന് കണിയമ്പാടി, വെടിത്തറക്കാൽ, ആറാട്ടുകടവ്, എരോൽ പ്രദേശങ്ങളിലേക്കുള്ള ഏക റോഡാണിത്. ശോച്യാവസ്ഥ കാരണം അത്യാവശ്യത്തിന് ഒാേട്ടാറിക്ഷകൾ പോലും വാടകക്ക് വിളിച്ചാൽ വരാറില്ലെന്ന് നാട്ടുകാർ പറയുന്നു. രണ്ടര കിലോമീറ്ററോളമുള്ള റോഡ് പൊതുമരാമത്ത് വകുപ്പിന് കൈമാറി മെക്കാഡം ടാറിങ് നടത്തി ഗതാഗതയോഗ്യമാക്കണമെന്നാണ് നാട്ടുകാരുടെ ആവശ്യം. ആറാട്ടുകടവിൽനിന്ന് ദേശീയപാതയിൽ എത്തിച്ചേരുന്ന മെക്കാഡം റോഡുമായി ബന്ധിപ്പിക്കുന്ന പാലക്കുന്ന് ആറാട്ടുകടവ് റോഡ് സഞ്ചാരയോഗ്യമാക്കിയാൽ പാലക്കുന്നിൽനിന്ന് പൊയിനാച്ചി, പെരിയ ഭാഗങ്ങളിലേക്ക് എളുപ്പത്തിൽ എത്തിച്ചേരാനാവും.