ജോ. ആര്‍.ടി ഓഫിസ്: മട്ടന്നൂരില്‍ സ്ഥല പരിശോധന നടത്തി

മട്ടന്നൂര്‍: ഇരിട്ടി താലൂക്കില്‍ അനുവദിച്ച ജോയൻറ് ആര്‍.ടി ഓഫിസ് ആരംഭിക്കുന്നതിന് മട്ടന്നൂരില്‍ സ്ഥലപരിശോധന നടത്തി. ഇരിട്ടി റോഡിലെ കെട്ടിടവും ഗ്രൗണ്ടുമാണ് ഉദ്യോഗസ്ഥര്‍ പരിശോധിച്ചത്. മട്ടന്നൂരില്‍ കെട്ടിടവും ഗ്രൗണ്ടും അനുയോജ്യമാണെന്നാണ് ഉദ്യോഗസ്ഥരുടെ വിലയിരുത്തൽ. തലശ്ശേരി ജോയൻറ് ആര്‍.ടി.ഒ എ.കെ. രാധാകൃഷ്ണ​െൻറ നേതൃത്വത്തിലായിരുന്നു പരിശോധന. പുതുതായി രൂപവത്കരിച്ച താലൂക്കുകളില്‍ കഴിഞ്ഞ ദിവസമാണ് ആര്‍.ടി.ഒ ഒാഫിസ് അനുവദിച്ചത്. കണ്ണൂര്‍ വിമാനത്താവളം യാഥാർഥ്യമാകുന്നതിനാല്‍ മട്ടന്നൂരില്‍ ആര്‍.ടി ഓഫിസ് സ്ഥാപിക്കണമെന്ന ആവശ്യം ശക്തമായതോടെയാണ് ഓഫിസിന് കെട്ടിടവും ഡ്രൈവിങ് ടെസ്റ്റിന് ആവശ്യമായ ഗ്രൗണ്ടും കണ്ടെത്തിയത്. മട്ടന്നൂര്‍-ഇരിട്ടി റോഡില്‍ സ്വകാര്യ വ്യക്തിയുടെ കെട്ടിടവും മലക്കുതാഴെയില്‍ പഴശ്ശി പദ്ധതിയുടെ ഉടമസ്ഥതയിലുള്ള ഗ്രൗണ്ടുമാണ് ഉദ്യോഗസ്ഥര്‍ പരിശോധിച്ചത്. മട്ടന്നൂര്‍ നഗരസഭയാണ് ആവശ്യമായ സ്ഥലവും കെട്ടിടവും കണ്ടെത്തിയത്. ഓഫിസ് ഈ മാസം തന്നെ ആരംഭിക്കാനാണ് അധികൃതരുടെ നീക്കം. ജോയൻറ് ആര്‍.ടി.ഒ എം.പി. റിയാസ്, എം.വി.ഐ വി. രാജീവ്, നഗരസഭ സ്റ്റാൻഡിങ് കമ്മിറ്റി ചെയര്‍മാന്മാരായ എ.കെ. സുരേഷ് കുമാര്‍, വി.പി. ഇസ്മായില്‍, കൗണ്‍സിലര്‍ എം. ഗംഗാധരന്‍ എന്നിവരും സംഘത്തിലുണ്ടായിരുന്നു.