കാറഡുക്കയിൽ യു.ഡി.എഫ്​ പിന്തുണയിൽ സി.പി.എമ്മിന്​ പ്രസിഡൻറ്​

ബദിയടുക്ക: ബി.ജെ.പിയെ പ്രസിഡൻറ് സ്ഥാനത്തുനിന്ന് പുറത്താക്കിയ കാറഡുക്ക പഞ്ചായത്തിൽ ലീഗ്-കോൺഗ്രസ് പിന്തുണയോടെ സി.പി.എം അംഗം പ്രസിഡൻറായി. സി.പി.എം സ്വതന്ത്ര അനസൂയ റൈയാണ് പുതിയ പ്രസിഡൻറ്. മുന്‍ പ്രസിഡൻറ് ബി.ജെ.പിയിലെ ജി. സ്വപ്‌നയെയാണ് ഏഴിനെതിരെ എട്ടു വോട്ടുകള്‍ക്ക് അനസൂയ പരാജയപ്പെടുത്തിയത്. സ്വപ്നയെ അവിശ്വാസത്തിലൂടെ പുറത്താക്കിയ സഖ്യം തന്നെയാണ് അനസൂയയെ പ്രസിഡൻറാക്കാനും ഒന്നിച്ചത്. കോൺഗ്രസ് സ്വതന്ത്രൻ വിനോദൻ നമ്പ്യാർ വൈസ് പ്രസിഡൻറായി തെരഞ്ഞെടുക്കപ്പെട്ടു. ഇദ്ദേഹത്തിനും എട്ടു വോട്ടുകൾ ലഭിച്ചു. നേരേത്ത ബി.ജെ.പി ഭരിച്ചിരുന്ന പഞ്ചായത്തില്‍ സി.പി.എം കൊണ്ടുവന്ന അവിശ്വാസപ്രമേയത്തെ യു.ഡി.എഫ് അംഗങ്ങള്‍ പിന്തുണച്ചതോടെ ബി.ജെ.പിക്ക് ഭരണം നഷ്ടപ്പെടുകയായിരുന്നു. പ്രാഥമിക സഹകരണ കാര്‍ഷിക ഗ്രാമീണ വികസന ബാങ്ക് അസി. രജിസ്ട്രാര്‍ ടി.പി. അഷ്‌റഫ് തെരഞ്ഞെടുപ്പ് നിയന്ത്രിച്ചു.