മരം കടപുഴകി; കൊട്ടിയൂർ ക്ഷേത്ര കൗണ്ടർ തകർന്നു

കൊട്ടിയൂർ: ഇക്കരെ കൊട്ടിയൂര്‍ ക്ഷേത്രത്തിനു സമീപത്തെ ദേവസ്വത്തി​െൻറ വഴിപാട് കൗണ്ടർ കൂറ്റന്‍ മരം കടപുഴകി പൂര്‍ണമായും തകര്‍ന്നു. വഴിപാട് കൗണ്ടറില്‍ ജീവനക്കാരും ദര്‍ശനത്തിനെത്തിയ ഭക്തജനങ്ങളും ഉണ്ടായിരുന്നെങ്കിലും ശബ്ദംകേട്ട് പുറത്തേക്ക് ഓടിമാറിയതിനാല്‍ വന്‍ അപകടം ഒഴിവായി. ചൊവ്വാഴ്ച രാവിലെ 11ഒാടെയായിരുന്നു സംഭവം. കൊട്ടിയൂരില്‍നിന്നുള്ള ചുമട്ടുതൊഴിലാളികളുടെയും മറ്റും നേതൃത്വത്തില്‍ മരം മുറിച്ചുനീക്കി. മഴയോടൊപ്പമുണ്ടായ ചുഴലിക്കാറ്റിൽ നാലു വീടുകൾ തകർന്നു. കൊട്ടിയൂർ പാലുകാച്ചിയിൽ സന്തോഷ് പൂതക്കുഴി, ശശി പറക്കോണം, നീനി കണിയഞ്ചാലിൽ എന്നിവരുടെ വീടുകളാണ് തകർന്നത്. കേളകം വെണ്ടേക്കുംചാലിൽ വയലിൽ ജോസി​െൻറ വീടും തകർന്നു. അപകടഭീഷണിയുണ്ടായിരുന്ന വീട്ടിൽ താമസമില്ലാതിരുന്നതിനാൽ ദുരന്തമൊഴിവായി.