ബസ് കാത്തുനിന്നവർക്കുമേൽ ഓടുകൾ തകർന്നുവീണു; മൂന്നുപേർക്ക് പരിക്ക്

ഉരുവച്ചാൽ: ബസ് കാത്തുനിൽക്കുന്നതിന് സമീപത്തെ കെട്ടിടത്തിലെ ഓടുകൾ തകർന്ന് ദേഹത്തുവീണ് മൂന്നുപേർക്ക് പരിക്ക്. ഉരുവച്ചാൽ ടൗണിൽ ഞായറാഴ്ച രാവിലെ എട്ടോടെയാണ് സംഭവം. മട്ടന്നൂർ ഭാഗത്തേക്ക് ബസ് കാത്തുനിൽക്കുന്ന സ്ഥലത്തെ ഇരുനില കെട്ടിടത്തി​െൻറ ഓടുകളാണ് വീണത്. ഒരാളുടെ തലയിലും രണ്ടുപേരുടെ ദേഹത്തുമാണ് വീണത്. പരിക്കേറ്റവർ ആശുപത്രിയിൽ ചികിത്സ തേടി. കെട്ടിടം കാലപ്പഴക്കത്താൽ ജീർണാവസ്ഥയിലായിട്ട് നാളേറെയായി. വിദ്യാർഥികളടക്കം നിരവധി പേർ ബസ് കാത്തുനിൽക്കുന്ന സ്ഥലത്താണ് കെട്ടിടം അപകടാവസ്ഥയിലുള്ളത്. ഞായറാഴ്ചയായതിനാലാണ് വലിയ അപകടം ഒഴിവായത്. അപകടാവസ്ഥയിലായ കെട്ടിടം പൊളിച്ചുമാറ്റാൻ നഗരസഭ ഉടമക്ക് നോട്ടീസ് നൽകും.