ഉപ്പളയിൽ സി.പി.എം പ്രവർത്തകൻ കുത്തേറ്റ് മരിച്ചു

മഞ്ചേശ്വരം: ഉപ്പള സോങ്കാലിൽ സി.പി.എം പ്രവർത്തകൻ കുത്തേറ്റ് മരിച്ചു. സോങ്കാൽ സ്വദേശി അസീസി​െൻറ മകൻ അബൂബക്കർ സിദ്ദീഖാണ് (21) മരിച്ചത്. ഞായറാഴ്ച രാത്രി 11ഒാടെയാണ് സംഭവം. ഗുരുതര പരിക്കേറ്റ സിദ്ദീഖിനെ ബഹളംകേട്ട് ഓടിയെത്തിയ നാട്ടുകാർ ആശുപത്രിയിലേക്ക് മാറ്റിയെങ്കിലും രക്ഷിക്കാനായില്ല. പ്രതികൾ ആർ.എസ്.എസ് പ്രവർത്തകരാണെന്ന് പൊലീസ് പറഞ്ഞു. രണ്ടു ബൈക്കിലെത്തിയ നാലംഗസംഘമാണ് അക്രമം നടത്തിയത്. ഒളിവിൽപോയ ഇവർക്കായി െപാലീസ് റെയ്ഡ് നടത്തുന്നുണ്ട്. ഖത്തറിൽ ജോലിചെയ്യുന്ന സിദ്ദീഖ് 10 ദിവസം മുമ്പാണ് നാട്ടിലെത്തിയത്. അക്രമത്തിനുപിന്നിലെ കാരണം വ്യക്തമല്ല. സംഭവത്തെ തുടർന്ന് കുമ്പള സി.ഐ പ്രേംസദ​െൻറ നേതൃത്വത്തിൽ വൻ െപാലീസ് സംഘം സ്ഥലത്ത് ക്യാമ്പ് ചെയ്യുന്നുണ്ട്.