സി.പി.ഐ (എം.എൽ) പ്രവർത്തകനെ സദാചാര പൊലീസ് ചമഞ്ഞ് മർദിച്ചതായി പരാതി

പയ്യന്നൂർ: . സി.പി.ഐ (എം.എൽ) റെഡ് സ്റ്റാർ ജില്ല കമ്മിറ്റി അംഗവും പരിസ്ഥിതി പ്രതിരോധ പ്രവർത്തകനുമായ പി.വി. പത്മനാഭനാണ് വെള്ളിയാഴ്ച രാത്രി രാമന്തളി കുന്നരു വടക്കേഭാഗത്ത് മർദനമേറ്റത്. സഹോദരിയുടെ വീട്ടിൽനിന്ന് ഭക്ഷണവും കഴിച്ച് കുരിശുമുക്കിലുള്ള സ്വന്തം വീട്ടിലേക്ക് പോകുമ്പോൾ സദാചാര പൊലീസ് ചമഞ്ഞ് അരമണിക്കൂറോളം വഴിയിൽ തടഞ്ഞുനിർത്തി പത്മനാഭനെ മർദിച്ചതായാണ് പരാതി. നെഞ്ചിനും കാലിനും വാരിയെല്ലിനും പരിക്കേറ്റ പത്മനാഭനെ പയ്യന്നൂർ താലൂക്ക് ആശുപത്രിയിലും തുടർന്ന് പരിയാരം മെഡിക്കൽ കോളജ് ആശുപത്രിയിലും പ്രവേശിപ്പിച്ചു. പ്രദേശത്തെ നാലു പേരടങ്ങുന്ന സംഘമാണ് മർദിച്ചതെന്ന് പയ്യന്നൂർ പൊലീസിൽ നൽകിയ പരാതിയിൽ പറയുന്നു. സദാചാര ഗുണ്ടായിസത്തിൽ സി.പി.ഐ (എം.എൽ) റെഡ് സ്റ്റാർ ജില്ല കമ്മിറ്റി പ്രതിഷേധിച്ചു. പ്രതികളെ ഉടൻ പിടികൂടണമെന്ന് ആവശ്യപ്പെട്ടു. യോഗത്തിൽ പി.വി. അശോകൻ അധ്യക്ഷത വഹിച്ചു. വിനോദ് കുമാർ രാമന്തളി, പി.പി. അബൂബക്കർ, കെ.പി. സത്യൻ എന്നിവർ പ്രസംഗിച്ചു.