അപകടഭീഷണി ഉയർത്തുന്ന മരങ്ങൾ മുറിക്കണം -താലൂക്ക് വികസന സമിതി

കണ്ണൂർ: ദേശീയപാതയോരത്ത് അപകടഭീഷണി ഉയർത്തുന്ന മരങ്ങൾ കൃത്യമായ പരിശോധന നടത്തി മുറിക്കണമെന്ന് കണ്ണൂർ താലൂക്ക് വികസന സമിതി. ഇപ്രകാരം മുറിക്കുന്ന മരങ്ങൾക്ക് വില നിശ്ചയിച്ച് ലേലം ചെയ്യാനുള്ള നടപടികൾ സ്വീകരിക്കണമെന്നും യോഗം നിർദേശിച്ചു. പുഴ പുറമ്പോക്കുകൾ, റോഡ് എന്നിവിടങ്ങളിലെ ൈകേയറ്റം തടയുന്നതിന് അതിർത്തി നിർണയിക്കുന്ന പ്രവൃത്തി ഉടൻ പൂർത്തിയാക്കാനും പരാതികൾ പരിഹരിക്കാനും ബന്ധപ്പെട്ട ഉദ്യോഗസ്ഥർക്ക് നിർദേശം നൽകി. ദേശീയപാതയിൽ അശാസ്ത്രീയമായി നിർമിച്ച ഡിവൈഡറും റോഡി​െൻറ നിർമാണ രീതിയും മൂലമുണ്ടാകുന്ന അപകടങ്ങൾ ഒഴിവാക്കാൻ വേണ്ട നടപടികൾ കൈക്കൊള്ളണം. നഗരത്തിൽ ചിലയിടങ്ങളിൽ തെരുവു വിളക്കുകൾ കത്തുന്നില്ലെന്നും സമിതി ചൂണ്ടിക്കാട്ടി. കോർപറേഷനിൽ കെട്ടിട നിയമം ലംഘിച്ചും ഭക്ഷ്യസുരക്ഷ അധികൃതരുടെ അനുവാദമില്ലാതെയും പ്രവർത്തിച്ചുവരുന്ന ഭക്ഷണശാലകൾക്കെതിരെ നടപടികൾ സ്വീകരിച്ചതായും ചില സ്ഥാപനങ്ങൾ പൂട്ടിയതായും കോർപറേഷൻ പ്രതിനിധി അറിയിച്ചു. യോഗത്തിൽ വളപട്ടണം പഞ്ചായത്ത് പ്രസിഡൻറ് വി.കെ. ലളിതാദേവി അധ്യക്ഷത വഹിച്ചു. തഹസിൽദാർ വി.എം. സജീവൻ, ഡെപ്യൂട്ടി തഹസിൽദാർ റോയ് തോമസ്, വികസന സമിതി അംഗങ്ങൾ, വിവിധ വകുപ്പ് പ്രതിനിധികൾ എന്നിവർ പങ്കെടുത്തു.