ഷുഹൈബ് വധം: ഡി.സി.സി പ്രസിഡൻറ്​ നിരാഹാരമിരിക്കുന്നു

കണ്ണൂര്‍: മട്ടന്നൂര്‍ നിയോജക മണ്ഡലം യൂത്ത് കോണ്‍ഗ്രസ് സെക്രട്ടറിയായിരുന്ന ഷുഹൈബ് വധത്തിലെ സി.പി.എം പങ്ക് അന്വേഷിക്കണമെന്നും മുഴുവന്‍ പ്രതികളെയും അറസ്റ്റ് ചെയ്യണമെന്നും ആവശ്യപ്പെട്ട് കണ്ണൂർ ഡി.സി.സി പ്രസിഡൻറ് സതീശന്‍ പാച്ചേനി നിരാഹാര സമരം ആരംഭിക്കുമെന്ന് കോണ്‍ഗ്രസ് നേതാക്കള്‍ വാർത്തസമ്മേളനത്തില്‍ അറിയിച്ചു. ആഗസ്റ്റ് എട്ടിന് രാവിലെ 10 മുതല്‍ 10ന് രാവിലെ 10 വരെയാണ് 48 മണിക്കൂര്‍ നിരാഹാര സമരം. എട്ടിന് രാവിലെ കോണ്‍ഗ്രസ് പ്രവര്‍ത്തക സമിതിയംഗം ഉമ്മൻ ചാണ്ടി സമരം ഉദ്ഘാടനം ചെയ്യും. സി.പി.എം ജില്ല നേതൃത്വത്തി​െൻറ അറിവോടെ ഏരിയ, ലോക്കല്‍ നേതാക്കള്‍ ആസൂത്രണം ചെയ്തതാണ് ഷുഹൈബി​െൻറ കൊലപാതകമെന്ന് നേതാക്കൾ ആരോപിച്ചു. സി.പി.എം നേതാക്കളുടെ നേരിട്ടുള്ള പങ്ക് പൊലീസിന് ബോധ്യപ്പെട്ടിട്ടും കൊലപാതക കൃത്യത്തില്‍ പങ്കെടുത്ത ക്രിമിനലുകളെ മാത്രം പ്രതിയാക്കി കേസന്വേഷണം അവസാനിപ്പിക്കുന്ന സമീപനമാണ് സ്വീകരിക്കുന്നത്. ഗൂഢാലോചന ഉള്‍പ്പെടെ ഈ കേസിലെ മുഴുവന്‍ പ്രതികളെയും നിയമത്തിനു മുന്നിലെത്തിക്കാന്‍ തുടരന്വേഷണം ഉണ്ടാകുമെന്നാണ് സംസ്ഥാന പൊലീസ് മേധാവി തന്നെ പറഞ്ഞത്. എന്നാല്‍, ആദ്യഘട്ടം നടത്തിയ അന്വേഷണത്തില്‍നിന്ന് മുന്നോട്ടുപോകാന്‍ പൊലീസ് തയാറാകുന്നില്ല. കുറ്റപത്രത്തില്‍ പറഞ്ഞ 12 മുതല്‍ 17 വരെയുള്ള പ്രതികളെയും ഇതുവരെ അറസ്റ്റ് ചെയ്തിട്ടില്ല. സര്‍ക്കാറും സി.പി.എമ്മും ഗൂഢാലോചന നടത്തി പൊലീസിനെ ഉപയോഗിച്ച് കൊലപാതക കേസിനെ ദുര്‍ബലപ്പെടുത്താന്‍ ശ്രമിക്കുകയാണെന്നും നേതാക്കൾ കുറ്റപ്പെടുത്തി. വാർത്തസമ്മേളനത്തില്‍ നേതാക്കളായ മാര്‍ട്ടിന്‍ ജോര്‍ജ്, എം.പി. മുരളി, ഡി.സി.സി പ്രസിഡൻറ് സതീശന്‍ പാച്ചേനി എന്നിവര്‍ സംബന്ധിച്ചു.