കാറില്‍ തട്ടിക്കൊണ്ടുപോയ കേസില്‍ ഒരാള്‍ അറസ്​റ്റില്‍

മട്ടന്നൂര്‍: പണവുമായി പോവുകയായിരുന്നയാളെ കാറില്‍ തട്ടിക്കൊണ്ടുപോയ കേസില്‍ ഒരാള്‍ അറസ്റ്റിൽ. ചാലക്കുടി വലിയോളിപറമ്പില്‍ സതീശനെയാണ് (28) മട്ടന്നൂര്‍ പൊലീസ് അറസ്റ്റ് ചെയ്തത്. മര്‍ദനത്തില്‍ പരിക്കേറ്റ് കണ്ണൂര്‍ ജില്ല ആശുപത്രിയില്‍ ചികിത്സയിലായിരുന്ന സതീശനെ ഡിസ്ചാര്‍ജ് ചെയ്ത ശേഷമാണ് അറസ്റ്റ് ചെയ്തത്. കഴിഞ്ഞ ശനിയാഴ്ച വടകര സ്വദേശി ടി.വി. ഹുസൈനിനെയാണ് കാറിലെത്തിയ സംഘം തട്ടിക്കൊണ്ടുപോയത്. ചാവശ്ശേരി പഴയ പോസ്റ്റ് ഓഫിസിനു സമീപമായിരുന്നു സംഭവം. രണ്ട് ലക്ഷം രൂപയുമായി റോഡരികിലൂടെ പോവുകയായിരുന്ന ഹുസൈനിനെ കാറിലെത്തിയ സംഘം തട്ടിക്കൊണ്ടുപോവുകയായിരുന്നു. തുടര്‍ന്ന് ചാവശ്ശേരി പറമ്പ് വഴി അമിതവേഗത്തില്‍ സഞ്ചരിച്ച കാര്‍ എതിരെ വന്ന ബൈക്കിനും കാറിനും ഇടിച്ചശേഷം ആട്ട്യലം റോഡരികിലെ കുഴിയിലേക്ക് മറിഞ്ഞതോടെ കാറിലുള്ളവര്‍ നാട്ടുകാരുടെ പിടിയിലാവുകയും പൊലീസിന് കൈമാറുകയുമായിരുന്നു. ഇവരില്‍ നിന്ന് കത്തിയും മൂന്ന് തോക്കിൻ തിരകളും കണ്ടെത്തിയിരുന്നു. പ്രദേശത്ത് നാട്ടുകാര്‍ നടത്തിയ പരിശോധനയില്‍ 1.7 ലക്ഷം രൂപയും കണ്ടെടുത്തു. പ്രതികള്‍ മര്‍ദനത്തില്‍ പരിക്കേറ്റ സതീശന്‍ മട്ടന്നൂരിലും എറണാകുളം സ്വദേശി വിശ്വന്‍ കണ്ണൂര്‍ ആശുപത്രിയിലും ചികിത്സയിലായിരുന്നു. സംഘത്തിലുണ്ടായിരുന്ന മറ്റുള്ളവര്‍ക്കുവേണ്ടി പൊലീസ് അന്വേഷണം നടത്തിവരുകയാണ്. സതീശനെ മട്ടന്നൂര്‍ മജിസ്‌ട്രേറ്റ് കോടതി റിമാൻഡ് ചെയ്തു. മട്ടന്നൂര്‍: ആളൊഴിഞ്ഞ സ്ഥലത്ത് കഞ്ചാവ് ഓയിലുമായി യുവാവ് അറസ്റ്റില്‍. മാങ്ങാട്ടിടത്തെ ഖാലിദ്(33) നെയാണ് മട്ടന്നൂര്‍ എസ്.ഐ ശിവന്‍ ചോടോത്തും സംഘവും അറസ്റ്റ് ചെയ്തത്. രഹസ്യ വിവരത്തെത്തുടര്‍ന്ന് മട്ടന്നൂര്‍ ഗവ. ആശുപത്രി പരിസരത്ത് പൊലീസ് നടത്തിയ പരിശോധനയിലാണ് നിര്‍മ്മാണത്തിലിരിക്കുന്ന കെട്ടിടത്തില്‍ വെച്ച് യുവാവിനെ പിടികൂടിയത്. സിഗരറ്റിലും വിവിധ ഉല്പന്നങ്ങളിലും ചേര്‍ത്ത് ഉപയോഗിക്കുന്നതാണ് കഞ്ചാവ് ഓയില്‍. മട്ടന്നൂര്‍ മജിസ്‌ത്രേട്ട് കോടതി പ്രതിയെ 14 ദിവസത്തേക്ക് റിമാന്റ് ചെയ്തു.