കെ.എസ്.ആർ.ടി.സി സംരക്ഷണസമിതി നിവേദനം നൽകി

കേളകം: മാനന്തവാടിയിൽനിന്ന് ഇരിട്ടിവഴിയുള്ള ബസുകൾ പുനരാരംഭിക്കണമെന്നാവശ്യപ്പെട്ട് കേളകം കെ.എസ്.ആർ.ടി.സി സംരക്ഷണസമിതി മാനന്തവാടി അസി. ട്രാൻസ്പോർട്ട് ഓഫിസർക്ക് നിവേദനം നൽകി. മാനന്തവാടിയിൽനിന്ന് രാവിലെ 7.30 കഴിഞ്ഞാൽ 8.20ന് കൽപറ്റ ഡിപ്പോയുടെ ഒരു ടി.ടി സർവിസും ഒരു ചെറിയ ബസും മാത്രമാണുള്ളത്. ടി.ടി സർവിസ് പലപ്പോഴും ഉണ്ടാവാറില്ല. മുമ്പ് ഇരിട്ടി, പറശ്ശിനിക്കടവ്, വെള്ളരിക്കുണ്ട്, കാഞ്ഞങ്ങാട് എന്നിവിടങ്ങളിലേക്ക് സർവിസുകൾ ഉണ്ടായിരുന്നു. സെപ്റ്റംബറിൽ കണ്ണൂർ വിമാനത്താവളം ഉദ്ഘാടനം ചെയ്യാനിരിക്കെ മാനന്തവാടിയിൽനിന്ന് ഇരിട്ടിവഴി കണ്ണൂരിലേക്ക് യാത്രാക്ലേശം നേരിടും. അതിനാൽ മുടങ്ങിയ സർവിസുകൾ എത്രയുംവേഗം പുനരാരംഭിക്കാൻ നടപടി വേണമെന്ന് സംരക്ഷണസമിതി ആവശ്യപ്പെട്ടു.