നിർമാണത്തൊഴിലാളി ക്ഷേമനിധി ബോർഡ് അദാലത്ത്; 10 ലക്ഷം രൂപയുടെ ധനസഹായ അപേക്ഷകൾ തീർപ്പായി

കണ്ണൂർ: കേരള നിർമാണത്തൊഴിലാളി ക്ഷേമനിധി ബോർഡ് ജില്ലയിലെ തൊഴിലാളികളുടെ തീർപ്പാകാതെകിടക്കുന്ന അപേക്ഷകൾക്കും പരാതികൾക്കും പരിഹാരം കാണുന്നതിനായി അദാലത്ത് സംഘടിപ്പിച്ചു. ബോർഡ് ചെയർമാൻ കെ.വി. ജോസി​െൻറ നേതൃത്വത്തിൽ ജില്ല പഞ്ചായത്ത് കോൺഫറൻസ് ഹാളിൽ നടന്ന അദാലത്തിൽ 125 പരാതികൾ ലഭിച്ചു. ഇവയിൽ 123 എണ്ണം പരിഹരിച്ചു. ബോർഡി​െൻറ കീഴിൽവരുന്ന പെൻഷൻ, വിവാഹ ധനസഹായം, ചികിത്സാ ധനസഹായം, മരണാനന്തര ധനസഹായം തുടങ്ങി നേരത്തെ തള്ളിയ അപേക്ഷകളുൾപ്പെടെയുള്ള അപേക്ഷകൾ അദാലത്തിൽ പരിഗണിച്ചു. ഇതുവഴി വിവിധ പദ്ധതികളിലായി 10 ലക്ഷത്തോളം രൂപയുടെ ധനസഹായ അപേക്ഷകളാണ് തീർപ്പായത്. ഭവനവായ്പ, ഉപകരണവായ്പ ഇനങ്ങളിൽ പിഴപ്പലിശ ഒഴിവാക്കിയും പലിശയിനത്തിൽ ആനുകൂല്യങ്ങൾ നൽകിയും നിരവധി കേസുകൾ ഒത്തുതീർപ്പാക്കിയതായി ബോർഡ് ചെയർമാൻ കെ.വി. ജോസ് പറഞ്ഞു. വർഷങ്ങളായി കിടക്കുന്ന അപേക്ഷകളിലെ പാകപ്പിഴകൾ നേരിട്ടു തിരുത്താനുള്ള അവസരവും തൊഴിലാളികൾക്ക് ലഭിച്ചു. ബോർഡ് അംഗങ്ങളായ തമ്പി കണ്ണാടൻ, സി.കെ. മുരളി, എക്സിക്യൂട്ടിവ് ഓഫിസർ സി.വി. അരുൺ, അക്കൗണ്ട്സ് ഓഫിസർ അജയകുമാർ, ഡി.ഇ.ഒ എൻ.എം. ഫൗസിയ എന്നിവരും അദാലത്തിൽ പങ്കെടുത്തു.