മംഗളൂരുവില്‍ ഏഴ്​ പദ്ധതികള്‍ മുഖ്യമന്ത്രി 22ന്​ ഉദ്ഘാടനംചെയ്യും

മംഗളൂരു: ജില്ലയില്‍ നിർമാണം പൂര്‍ത്തിയാക്കിയ 252.50 കോടി രൂപയുടെ പദ്ധതികള്‍ ഞായറാഴ്ച മുഖ്യമന്ത്രി സിദ്ധരാമയ്യ ഉദ്ഘാടനംചെയ്യുമെന്ന് ജില്ല ചുമതലയുള്ള മന്ത്രി ബി. രമാനാഥ റൈ വാർത്താസമ്മേളനത്തില്‍ അറിയിച്ചു. 104.21 കോടി രൂപ ചെലവില്‍ നടപ്പാക്കുന്ന പദ്ധതികളുടെ ശിലാസ്ഥാപനങ്ങളും മുഖ്യമന്ത്രി നിർവഹിക്കും. മിനി വിധാന്‍ സൗധ, ഇന്‍സ്പെക്ഷന്‍ ബംഗ്ലാവ്, ബണ്ട്വാള്‍ കെ.എസ്.ആർ.ടി.സി ബസ്സ്റ്റാൻഡ്, 100 കിടക്കസൗകര്യമുള്ള ആശുപത്രി, മെസ്കോം കെട്ടിടം, വൃക്ഷ ഉദ്യാനം, ആർ.ടി.ഒ ഓഫിസ് കെട്ടിടം എന്നിവയാണ് ഉദ്ഘാടനംചെയ്യുന്നത്. പഞ്ചെ മങ്കേഷ് റാവു ഓഡിറ്റോറിയം, അഞ്ചലമൊഗറു പാലം, കുടിവെള്ളവിതരണ പദ്ധതികള്‍ തുടങ്ങിയവക്കാണ് ശിലയിടുക.