താഴെ ചൊവ്വ, നടാൽ റെയിൽവേ മേൽപാലം നിർമാണം ഉടൻ

കണ്ണൂര്‍: താഴെ ചൊവ്വ, നടാല്‍ റെയിൽവേ മേൽപാലങ്ങളുടെ പണി ഉടന്‍ ആരംഭിക്കാന്‍ പി.കെ. ശ്രീമതി എം.പി വിളിച്ചു ചേര്‍ത്ത യോഗത്തില്‍ തീരുമാനം. കേന്ദ്രസര്‍ക്കാറി​െൻറ സേതുഭാരതം പദ്ധതിയില്‍ അംഗീകരിച്ചവയാണ് ഇവ രണ്ടും. സാങ്കേതിക നടപടികള്‍ അതിവേഗം പൂര്‍ത്തിയാക്കി പ്രവൃത്തി ആരംഭിക്കണമെന്ന് എം.പി ഉദ്യോഗസ്ഥര്‍ക്ക് നിര്‍ദേശം നല്‍കി. ജില്ലയില്‍ ഇപ്പോള്‍ നടന്നുവരുന്ന പ്രധാനപ്പെട്ട പൊതുമരാമത്ത് പ്രവൃത്തികളുടെ കാലതാമസം ഒഴിവാക്കുന്നതിനാവശ്യമായ നടപടികള്‍ ഉന്നത ഉദ്യോഗസ്ഥരുടെ സാന്നിധ്യത്തില്‍ ചര്‍ച്ചയായി. കേന്ദ്രസര്‍ക്കാറി​െൻറയും റെയിൽേവയുടെയും അനുമതി ആവശ്യമുള്ളവയുടെ തടസ്സം നീക്കാന്‍ എം.പി നേരിട്ട് ഇടപെടും. പാപ്പിനിശ്ശേരി സബ്‌വേ, താവം റെയിൽവേ മേൽപാലം, തലശ്ശേരി-വളവുപാറ റോഡ് എന്നിവയെക്കുറിച്ച് വിശദമായ ചര്‍ച്ചനടന്നു. പാപ്പിനിശ്ശേരി സബ്‌വേ നിര്‍മാണത്തിന് ആവശ്യമായ എൻ.ഒ.സിക്കുള്ള അപേക്ഷ റെയിൽവേക്ക് ഉടന്‍ നല്‍കും. ഓവുചാല്‍ നിര്‍മാണവും വേഗത്തില്‍ പൂര്‍ത്തിയാക്കും. താവം പാലം പൂര്‍ത്തീകരണത്തിനുള്ള തടസ്സം പ്രവൃത്തിയുടെ മാറ്റത്തിന് അംഗീകാരം ലഭിക്കാത്തതാണെന്ന് കെ.എസ്.ടി.പി അധികൃതര്‍ വിശദീകരിച്ചു.