മുന്നറിയിപ്പ് സംവിധാനമില്ല; ഡിവൈഡറിൽ വാഹനങ്ങൾ ഇടിച്ചുകയറി അപകടം തുടർക്കഥ

ഉരുവച്ചാൽ: അപകടമേഖലയായ ഉരുവച്ചാൽ ടൗണിൽ അപകടം കുറക്കാൻവേണ്ടി സ്ഥാപിച്ച ഡിവൈഡർ അപകടം ക്ഷണിച്ചുവരുത്തുന്നു. വെള്ളിയാഴ്ച രാത്രിയുണ്ടായ അപകടത്തിൽ മൂന്നുപേർ രക്ഷപ്പെട്ടത് തലനാരിഴക്കാണ്. ഏതാനും വർഷംമുമ്പ് ഇവിടെ വാഹനാപകടത്തിൽ മൂന്നുപേർ മരിച്ചിരുന്നു. ഇതോടെയാണ് റോഡിൽ ഡിവൈഡർ സ്ഥാപിച്ചത്. എന്നാൽ, ഡിവൈഡർ സൂചിപ്പിക്കുന്ന സിഗ്‌നൽ ഇല്ലാത്തതിനാൽ വാഹനങ്ങൾ അപകടത്തിൽപെടുകയാണ്. വാഹനം ഇടിച്ച് ഡിവൈഡറി​െൻറ നാലു കുറ്റികൾ തകർന്നു. ചെറിയവാഹനങ്ങളും ഡിവൈഡറിലൂടെ കയറി അപകടം വരുത്തുകയാണ്. കഴിഞ്ഞദിവസം രാത്രി കൂത്തുപറമ്പ് ഭഗത്തുനിന്ന് വരുകയായിരുന്ന കാർ ഡിവൈഡറിൽ ഇടിച്ചുകയറി നിയന്ത്രണംവിട്ടിരുന്നു. റോഡരികിൽ നിൽക്കുകയായിരുന്ന മൂന്നുപേർ ഉഗ്രശബ്ദംകേട്ട് മാറിനിന്നതിനാലാണ് രക്ഷപ്പെട്ടത്. നാട്ടുകാരും മട്ടന്നൂർ എസ്.ഐ രാജീവ് കുമാറി​െൻറ നേതൃത്വത്തിൽ പൊലീസും ചേർന്നാണ് വാഹനം മാറ്റിയത്. കാറിന് കേടുപാട് സംഭവിച്ചെങ്കിലും ആർക്കും പരിക്കില്ല. കൂത്തുപറമ്പ് ഭാഗത്തുനിന്ന് വരുന്ന വാഹനങ്ങൾ ഇവിടത്തെ കൊടുംവളവിൽ എത്തുമ്പോൾ സ്ഥലപരിചയം ഉള്ള ഡ്രൈവർമാർക്ക് മാത്രമേ ഡിവൈഡർ ഉള്ള കാര്യം ശ്രദ്ധയിൽപ്പെടൂ. രാത്രിയിലാണ് അപകടം കൂടുതൽ നടക്കുന്നത്. ഒരു ദുരന്തം വരുന്നതിന് മുമ്പ് ഡിവൈഡറുകൾ പുതുക്കിപ്പണിയാനും ആവശ്യമായ മുന്നറിയിപ്പ് സംവിധാനം ഒരുക്കാനും നടപടി ഉണ്ടാവണമെന്ന് നാട്ടുകാർ ആവശ്യപ്പെടുന്നു.