ഹോമിയോ ക്ലിനിക്കിൽ ചികിത്സ തേടുന്നവർക്ക്​ മരുന്ന്​ കൊടുക്കുന്നതിന് വിലക്കില്ല

കോഴിക്കോട്: ഹോമിയോ ക്ലിനിക്കുകൾ നടത്തുന്ന ഡോക്ടർമാരുടെ ചികിത്സയിലുള്ള രോഗികൾക്കല്ലാതെ പുറത്തുനിന്നുള്ളവർക്ക് ഇനി മരുന്ന് വിൽക്കാനാവില്ല. കേന്ദ്ര ആരോഗ്യമന്ത്രാലയത്തി​െൻറ പുതുക്കിയ ഡ്രഗ്സ് ആൻഡ് കോസ്മെറ്റിക്സ് ആക്ടിലാണ് നിർദേശം. എന്നാൽ, ക്ലിനിക്കിൽ ചികിത്സ തേടുന്ന രോഗികൾക്ക് മരുന്ന് നൽകുന്നതിന് (ഡിസ്െപൻസ് ചെയ്യുന്നതിന്) വിലക്കില്ല. ഹോമിയോ മരുന്നു വിപണനകേന്ദ്രത്തി​െൻറ ഭാഗമായി ക്ലിനിക് പ്രവർത്തിക്കാനാവില്ല. അതേസമയം, അലോപ്പതി മരുന്നുകടകളിൽ ഇനിമുതൽ ഹോമിയോ മരുന്നുകൾ വിൽക്കാമെന്നും ഇതിന് യോഗ്യരായ ഫാർമസിസ്റ്റുകൾ ഉണ്ടായിരിക്കണമെന്നും ഭേദഗതിയിൽ പറയുന്നു. ഹോമിയോ ഡോക്ടർമാരുടെ ക്ലിനിക്കുകളിൽ ഇനി മരുന്നുവിൽപന പാടില്ലെന്ന തരത്തിൽ വന്ന വാർത്തകൾ (മാധ്യമത്തിലല്ല) തെറ്റാണെന്ന് ദ ഇൻസ്റ്റിറ്റ്യൂട്ട് ഓഫ് ഹോമിയോപത്സ് കേരളയും (ഐ.എച്ച്.കെ) ഇന്ത്യൻ ഹോമിയോപതിക് മെഡിക്കൽ അസോസിയേഷനും (ഐ.എച്ച്.എം.എ) വ്യക്തമാക്കി. നിലവിൽ സംസ്ഥാനത്തൊരിടത്തും ഡോക്ടർമാരുടെ കീഴിലുള്ള അംഗീകൃത ഹോമിയോ ക്ലിനിക്കുകളിൽ പുറത്തുനിന്നുള്ളവർക്ക് മരുന്നു വിൽപന നടത്തുന്നില്ലെന്ന് ഐ.എച്ച്.കെ സംസ്ഥാന പ്രസിഡൻറ് ഡോ. ഉണ്ണികൃഷ്ണൻ ബി. നായർ പറഞ്ഞു.