യാത്രക്കാർ പ്രാർഥിക്കുന്നു; പള്ളിക്കര ഗേറ്റ് അടക്കല്ലേ

ചെറുവത്തൂർ: ദേശീയപാതയിൽ ചെറുവത്തൂരിനും നീലേശ്വരത്തിനുമിടയിൽ യാത്രക്കാരുടെ സമയം അപഹരിക്കുന്നതിൽ വില്ലനായി പള്ളിക്കര റെയിൽവേ ഗേറ്റ്. ട്രെയിൻ കടന്നുപോകുന്നതിനായി ദീർഘനേരം അടച്ചിടുന്ന ഈ ഗേറ്റിൽ കുടുങ്ങിയാൽ ഒരു മണിക്കൂറോളം യാത്രക്കാർക്ക് നഷ്ടമാകുന്ന സ്ഥിതിയാണ്. ഗേറ്റ് തുറന്നാൽ വാഹനങ്ങൾ വരിതെറ്റിപ്പോകുന്നത് പലപ്പോഴും ഗതാഗതക്കുരുക്കിനും ഇടയാക്കുന്നുണ്ട്. ഗേറ്റ് തുറന്നാൽ ബസുകളുടെ മത്സരപ്പാച്ചിലുമാണിവിടെ. വിദ്യാർഥികൾ, ഉേദ്യാഗസ്ഥർ, മറ്റ് തൊഴിലാളികൾ തുടങ്ങി നിരവധിപേർക്ക് കൃത്യസമയത്ത് എത്തുന്നതിന് തടസ്സമാവുകയാണ് നിത്യേന ഈ ഗേറ്റ്. ദേശീയപാതയിൽ സംസ്ഥാനത്തുള്ള ഏക റെയിൽവേ ഗേറ്റാണിത്. ഇവിടെ മേൽപാലം പണിയണമെന്നത് വർഷങ്ങളായുള്ള ആവശ്യവുമാണ്. സ്ഥലം, എം.പിയുടെ വീടിനടുത്തായിട്ടും വേണ്ട ഇടപെടൽ നടത്തുന്നില്ലെന്നതാണ് പൊതുവെ ഉയർന്ന പരാതി.