പൂട്ടിയിട്ട വീട്ടിൽനിന്ന് 16 പവൻ കവർന്നു

കുമ്പള: പൂട്ടിയിട്ട വീട്ടിൽനിന്ന് 16 പവൻ ആഭരണങ്ങളും മൊബൈൽഫോണും കവർന്നു. കട്ടത്തടുക്ക മുഹിമ്മാത്തിനടുത്ത് അബ്ദുല്ലക്കുഞ്ഞിയുടെ വീട്ടിൽ ഞായറാഴ്ച വൈകീട്ട് 4.30നും രാത്രി 10നുമിടയിലാണ് കവർച്ച. അബ്ദുല്ലക്കുഞ്ഞിയുടെ മകൻ ത്വാഹയുടെ വിവാഹനിശ്ചയത്തിന് കുടുംബം വീടുപൂട്ടി പോയ സമയത്താണ് കവർച്ച നടന്നത്. വീട് പൂട്ടി താക്കോൽ ജനാലക്കരികിൽെവച്ചാണ് ഇവർ പോയിരുന്നത്. ഈ താക്കോൽ കണ്ടെടുത്ത് കതക് തുറന്നാണ് മോഷ്ടാക്കൾ അകത്തു കടന്നത്. കിടപ്പറയിലെ അലമാരയിൽ സൂക്ഷിച്ച മൂന്നരലക്ഷത്തോളം രൂപ വിലമതിക്കുന്ന ആഭരണങ്ങളും രണ്ട് മൊബൈൽഫോണുകളുമാണ് നഷ്ടപ്പെട്ടത്. പൊലീസ് കേസെടുത്ത് അന്വേഷണം ആരംഭിച്ചു. വിരലടയാളവിദഗ്ധരെത്തി തെളിവുകൾ ശേഖരിച്ചു. ഈ പ്രദേശത്തെപ്പറ്റി നന്നായറിയാവുന്ന ആരോ ആണ് മോഷണത്തിന് പിന്നിലെന്ന് പൊലീസ് സംശയിക്കുന്നു.