ജില്ല ആശുപത്രിയിൽ ഡോക്ടർമാർ അവധിയിൽ; താറുമാറായി അഞ്ചോളം വിഭാഗങ്ങൾ

കണ്ണൂർ സിറ്റി: ജില്ല ആശുപത്രിയിൽ ഡോക്ടർമാർ കൂട്ട അവധിയെടുത്തതിനെ തുടർന്ന് അഞ്ചോളം വിഭാഗത്തിൽ ഒ.പിയിലെത്തിയ രോഗികൾ വലഞ്ഞു. മെഡിക്കൽ, സ്കിൻ, ഇ.എൻ.ടി, ഓർത്തോ, സർജറി മുതലായ വിഭാഗത്തിലെ ഡോക്ടർമാരാണ് ബുധനാഴ്ച കൂട്ട അവധിയെടുത്തത്. ഇതേതുടർന്ന് ഒ.പിയിൽ പരിശോധനക്കെത്തിയ നൂറുകണക്കിന് രോഗികൾക്ക് വലിയ തുക നൽകി സ്വകാര്യ ആശുപത്രികളെ ആശ്രയിക്കേണ്ടിവന്നു. സാധാരണഗതിയിലും മൂന്നിരട്ടി ആളുകളാണ് ബുധനാഴ്ച ജില്ല ആശുപത്രിയിൽ എത്തിയത്. ഒ.പി ടിക്കറ്റ് എടുക്കുന്ന സ്ഥലത്ത് മണിക്കൂറുകളോളം ക്യൂവിൽനിന്നും ടിക്കറ്റ് എടുത്തു കഴിഞ്ഞതിന് ശേഷവുമാണ് പല വിഭാഗങ്ങളിലും ഡോക്ടർമാരില്ലെന്ന് രോഗികൾ അറിയുന്നത്. തുടർന്ന് നിരാശരായ രോഗികൾ ആശുപത്രി ജീവനക്കാരോട് പ്രതിഷേധിച്ചു.