വീടിനു മുന്നില്‍ അടയാളപ്പെടുത്തല്‍; പൊലീസ് അന്വേഷണം തുടങ്ങി

ചെറുപുഴ: വീടുകള്‍ക്ക് മുന്നിലെ മതിലില്‍ സംശയാസ്പദമായ അടയാളപ്പെടുത്തലുകള്‍ കണ്ട സംഭവത്തില്‍ ചെറുപുഴ പൊലീസ് അന്വേഷണം തുടങ്ങി. തിരുമേനി കോക്കടവിലെ ചെമ്പരത്തിക്കല്‍ ഫ്രാന്‍സിസി​െൻറ വീടിനു മുന്നിലെ മതിലില്‍ പ്രേത്യകതരം അടയാളപ്പെടുത്തലുകള്‍ നടത്തിയ സംഭവത്തിലാണ് അന്വേഷണം. മോഷണ സംഘങ്ങള്‍ അടയാളമിട്ട് കടന്നുകളഞ്ഞതാണെന്ന നിഗമനത്തിലാണ് നാട്ടുകാര്‍. ചൊവ്വാഴ്ച രാവിലെയാണ് ഇംഗ്ലീഷ് അക്ഷരങ്ങള്‍ കൊണ്ട് അടയാളപ്പെടുത്തിയിരിക്കുന്നത് വീട്ടുകാര്‍ കണ്ടത്. സമാനമായ സംഭവം കഴിഞ്ഞദിവസം പെരിങ്ങോം പൊലീസ് സ്റ്റേഷന്‍ പരിധിയിലുമുണ്ടായിരുന്നു. വീടുകള്‍ക്ക് മുന്നില്‍ അടയാളമിട്ട് കടന്നുകളയാന്‍ ശ്രമിച്ച നാടോടി സ്ത്രീകളെ നാട്ടുകാര്‍ പിടികൂടി പൊലീസില്‍ ഏല്‍പിക്കുകയായിരുന്നു.