കരാറുകാർ സമരത്തിലേക്ക്​​; കലക്​ടറേറ്റ്​ മാർച്ച്​ നാളെ

കണ്ണൂർ: ടെൻഡറുകൾ ഏറ്റെടുക്കാതെ ജില്ലയിലെ ഗവ. കരാറുകാർ സമരം ആരംഭിക്കുകയാണെന്ന് കോൺ‌ട്രാക്ടേഴ്സ് കോ-ഓഡിനേഷൻ കമ്മിറ്റി ഭാരവാഹികൾ വാർത്തസമ്മേളനത്തിൽ പറഞ്ഞു. നിർമാണസാമഗ്രികളുടെ ലഭ്യത ഉറപ്പാക്കുക, ബില്ലുകൾ സമയബന്ധിതമായി പാസാക്കുക, വാട്ടർ അതോറിറ്റിയിൽ അറ്റകുറ്റപ്രവൃത്തികൾ നടത്തിയതി‍​െൻറ 14 മാസത്തെ ബിൽ കുടിശ്ശിക ഓണത്തിനുമുമ്പ് കൊടുത്തു തീർക്കുക തുടങ്ങിയ ആവശ്യങ്ങളുന്നയിച്ചാണ് തദ്ദേശസ്വയംഭരണ സ്ഥാപനങ്ങൾ, പൊതുമരാമത്ത്, ഇറിഗേഷൻസ്, വാട്ടർ അതോറിറ്റി വിഭാഗങ്ങളിലെ ടെൻഡറുകൾ ഏറ്റെടുക്കാതെ ഗവ. കരാറുകാർ സമരം ആരംഭിക്കുന്നത്. ഇതി‍​െൻറ ഭാഗമായി ബുധനാഴ്ച കലക്ടറേറ്റിലേക്ക് മാർച്ചും ധർണയും നടത്തും. ജില്ലയിൽ 2017--18 സാമ്പത്തിക വർഷത്തിൽ ആയിരം കോടിരൂപയുടെ നിർമാണ പ്രവർത്തനങ്ങൾക്ക് അംഗീകാരം നൽകിയിട്ടുണ്ട്. എന്നാൽ, ആവശ്യമായ നിർമാണ സാമഗ്രികൾ ലഭിക്കാത്ത അവസ്ഥയാണ്. ജില്ലയിൽ പ്രവർത്തിച്ചിരുന്ന ആയിരത്തോളം ക്വാറികളും 125 ക്രഷറുകളും ഹരിത ട്രൈബ്യൂണലി‍​െൻറ ഉത്തരവനുസരിച്ച് അടച്ചിട്ടു. കൂടാതെ ജി.എസ്.ടി പ്രകാരം ക്രഷർ ഉൽപന്നങ്ങളുടെ നികുതി അഞ്ച് ശതമാനമാണ്. നിർമാണസാമഗ്രികളുടെ ക്ഷാമം പരിഹരിക്കാനുള്ള നടപടികൾ ജില്ല അധികാരികളിൽനിന്ന് ഉണ്ടായിട്ടില്ല. ഈ സാഹചര്യത്തിലാണ് സമരവുമായി മുന്നോട്ടുപോകുന്നതെന്ന് ഭാരവാഹികൾ പറഞ്ഞു. വാർത്തസമ്മേളനത്തിൽ സി.എച്ച്. അബൂബക്കർ ഹാജി, സി. രാജൻ, സി. ശശിധരൻ, സി. അബ്ദുൽകരീം, കെ.കെ. രാധാകൃഷ്ണൻ തുടങ്ങിയവർ പങ്കെടുത്തു.