എസ്​.​െഎയെ കൈയേറ്റം ചെയ്​ത കേസിൽ യുവാവ്​ അറസ്​റ്റിൽ

കാസർകോട്: ഗതാഗതതടസ്സം നീക്കാനെത്തിയ എസ്.ഐയെ കൈയേറ്റം ചെയ്യുകയും കൃത്യനിര്‍വഹണം തടസ്സപ്പെടുത്തുകയും ചെയ്തെന്ന കേസില്‍ ഒരാളെ അറസ്റ്റ് ചെയ്തു. മുളിയാര്‍ കാറഡുക്ക മൗവ്വാറിലെ ഉദയപ്രസാദിനെയാണ് (39) ആദൂര്‍ പൊലീസ് അറസ്റ്റ് ചെയ്തത്. ആദൂര്‍ എസ്.ഐ പ്രശോഭി​െൻറ പരാതി പ്രകാരമാണിത്. കഴിഞ്ഞ ദിവസം വൈകീട്ട് മുള്ളേരിയ ടൗണിലാണ് സംഭവം. ഗതാഗത തടസ്സമുണ്ടാക്കുന്ന വിധത്തിൽ നിർത്തിയിട്ട വാൻ നീക്കാൻ ഡ്രൈവര്‍ തയാറാകാഞ്ഞതിനെ തുടർന്ന് കസ്റ്റഡിയിലെടുക്കാന്‍ ശ്രമിച്ചപ്പോൾ ഒരുസംഘം എസ്.ഐയെ ആക്രമിക്കുകയായിരുന്നുവെന്നാണ് കേസ്. സംഭവത്തിൽ ഉദയപ്രസാദ്, ഹരി, രാജു തുടങ്ങി കണ്ടാലറിയാവുന്ന 50 പേര്‍ക്കെതിരെയാണ് കേസെടുത്തത്. അതേ സമയം, എസ്.ഐയും പൊലീസ് ജീപ്പ് ഡ്രൈവറും മര്‍ദിച്ചെന്നാരോപിച്ച് വാന്‍ ഡ്രൈവര്‍ മുള്ളേരിയ മൈത്രി നഗറിലെ രാജഗോപാലന്‍ (33), സൗമ്യ (38) എന്നിവരെ പുത്തൂര്‍ ആശുപത്രിയില്‍ പ്രവേശിപ്പിച്ചിട്ടുണ്ട്. ഗര്‍ഭിണിയായ സൗമ്യയെ ആശുപത്രിയിലേക്ക് കൊണ്ടുപോകുംവഴി, കൈകാണിച്ചിട്ടും നിര്‍ത്തിയില്ലെന്നാരോപിച്ച് പൊലീസ് വാൻ തടഞ്ഞ് തങ്ങളെ വലിച്ചിറക്കി മര്‍ദിച്ചെന്നും ഇത് തടയാനെത്തിയ നാട്ടുകാര്‍ക്കെതിരെയാണ് കേസെടുത്തതെന്നും രാജഗോപാലൻ പറയുന്നു.