റോഡ് നവീകരണം: തലശ്ശേരിയില്‍ ജനകീയ കൂട്ടായ്മക്ക് തുടക്കം

തലശ്ശേരി: ഗതാഗതക്കുരുക്കില്‍ വീര്‍പ്പുമുട്ടുന്ന തലശ്ശേരി പട്ടണത്തിലെ റോഡുകള്‍ വീതികൂട്ടി നവീകരിക്കുന്നത് സംബന്ധിച്ച് ചര്‍ച്ച ചെയ്യുന്നതിനായി ജനകീയ കൂട്ടായ്മക്ക് തുടക്കം കുറിച്ചു. നഗരത്തിലെ ഗതാഗതക്കുരുക്ക് ഒഴിവാക്കുന്നതിനായി നഗരസഭയുടെ നേതൃത്വത്തില്‍ പ്രധാന റോഡുകള്‍ വീതികൂട്ടി നവീകരിക്കും. ആദ്യഘട്ടമെന്ന നിലയില്‍ ഒ.വി. റോഡ്, ലോഗന്‍സ് റോഡ് എന്നിവയുമായി ബന്ധപ്പെട്ടവരുടെ യോഗം ശനിയാഴ്ച നടന്നു. ബന്ധപ്പെട്ട കച്ചവടക്കാരും സ്ഥലമുടമകളും വ്യാപാര സംഘടനാ പ്രതിനിധികളും രാഷ്ട്രീയ പാര്‍ട്ടി പ്രതിനിധികളും ജനപ്രതിനിധികളും യോഗത്തില്‍ സംബന്ധിച്ചു. റോഡ് നവീകരണം യോഗം ഐകകണ്ഠ്യേന അംഗീകരിച്ചതായി നഗരസഭാ ചെയര്‍മാന്‍ സി.കെ.രമേശന്‍ പറഞ്ഞു. ഇരു യോഗങ്ങളിലും ചെയര്‍മാന്‍ അധ്യക്ഷത വഹിച്ചു. ഒ.വി. റോഡ് നവീകരണത്തിന് വാഴയില്‍ വാസു കണ്‍വീനറായും ലോഗന്‍സ് റോഡ് വികസനത്തിന് കൗണ്‍സിലര്‍ എം.പി. അരവിന്ദാക്ഷന്‍ കണ്‍വീനറായും ജനകിയ കമ്മിറ്റിക്ക് രൂപം നല്‍കിയിട്ടുണ്ട്. രണ്ടു കമ്മിറ്റികളുടെയും ചെയര്‍മാന്‍ നഗരസഭാ ചെയര്‍മാന്‍ സി.കെ. രമേശന്‍ തന്നെയാണ്. ഇവക്കൊപ്പം മെയിന്‍ റോഡ്, ടൗണ്‍ഹാള്‍ റോഡ് എന്നിവയും വീതി കൂട്ടുന്നുണ്ട്. തിങ്കളാഴ്ച രാവിലെ 10ന് മെയിന്‍ റോഡ് ആലോചനാ യോഗം പാരിസ് പ്രസിഡന്‍സിയിലും ടൗണ്‍ഹാള്‍ റോഡ് യോഗം വൈകീട്ട് 4.30ന് ടൗണ്‍ഹാളിലും ചേരും.