പ്രോ വൈസ് ചാന്‍സലറെ കെ.എസ്.യു പ്രവര്‍ത്തകര്‍ ഉപരോധിച്ചു

കണ്ണൂര്‍: കെ.എസ്.യു പ്രവര്‍ത്തകര്‍ കണ്ണൂര്‍ സര്‍വകലാശാല പ്രോ വൈസ് ചാന്‍സലര്‍ ടി. അശോകനെ ഉപരോധിച്ചു. ബി.എ എല്‍എല്‍.ബി കോഴ്സിന് ബാര്‍ കൗണ്‍സിലിന്‍െറയും ഫിസിക്കല്‍ എജുക്കേഷന്‍ കോഴ്സിന് ദേശീയ കൗണ്‍സിലിന്‍െറയും അംഗീകാരം നഷ്ടപ്പെടാനിടയായതില്‍ പ്രതിഷേധിച്ചും സമഗ്രാന്വേഷണം വേണമെന്ന് ആവശ്യപ്പെട്ടുമാണ് ഉപരോധം. തുടര്‍ന്ന് സമരക്കാരുമായി പി.വി.സി നടത്തിയ ചര്‍ച്ചയെ തുടര്‍ന്നാണ് ഉപരോധം പിന്‍വലിച്ചത്. ഫിസിക്കല്‍ എജുക്കേഷന്‍ കോഴ്സിന്‍െറ അംഗീകാരം ഒരാഴ്ചക്കുള്ളില്‍ പുന:സ്ഥാപിക്കാമെന്നും ബി.എ എല്‍എല്‍.ബി കോഴ്സിന് ഏപ്രില്‍ 25നുമുമ്പ് ഫീസടച്ച് ബാര്‍ കൗണ്‍സിലിന് അപേക്ഷ നല്‍കുമെന്നും പി.വി.സി ഉറപ്പുനല്‍കി. നിയമ പഠനത്തിന് പുതിയ ബാച്ച് നോട്ടിഫിക്കേഷന്‍ മേയ് പകുതിയോടെ നടത്തും. ബാര്‍ കൗണ്‍സില്‍ ഓഫ് ഇന്ത്യ ചെയര്‍മാനുമായി ചര്‍ച്ച നടത്തി നിയമ പഠന വകുപ്പിലെ പ്രശ്നങ്ങള്‍ പരിഹരിക്കുമെന്നും അറിയിച്ചു. ജില്ലാ പ്രസിഡന്‍റ് സുധീപ് ജെയിംസ്, റോബര്‍ട്ട് വെള്ളാംവള്ളി, വി.പി. അബ്ദുറഷീദ്, എം.കെ. വരുണ്‍, നൗഫല്‍ ആറളം തുടങ്ങിയവര്‍ നേതൃത്വം നല്‍കി.