മണല്‍ മാഫിയക്ക് ശക്തമായ താക്കീത് നല്‍കി വളപട്ടണം പൊലീസ്

വളപട്ടണം: വളപട്ടണം പുഴ കേന്ദ്രീകരിച്ച് മണല്‍ കടത്തുന്ന മാഫിയകള്‍ക്ക് ശക്തമായ താക്കീത് നല്‍കി വളപട്ടണം പൊലീസ്. അനധികൃത മണല്‍കടത്തില്‍ പിടിച്ചെടുക്കുന്ന വള്ളങ്ങള്‍ പുഴയില്‍വെച്ചുതന്നെ തകര്‍ക്കുമെന്ന് പൊലീസ് മുന്നറിയിപ്പു നല്‍കി. വളപട്ടണം പാലം മുതല്‍ പറശ്ശിനിക്കടവ് പാലംവരെ ദേശീയ ഹരിത ട്രൈബ്യൂണലിന്‍െറയും കോടതിയുടെയും മണല്‍വാരല്‍ നിരോധമുള്ളതിനാല്‍ ഈ ദൂരപരിധിക്കുള്ളില്‍ മണല്‍ വാരുന്നത് നിരോധിച്ചുകൊണ്ട് മണല്‍ വാരല്‍ സംഘങ്ങള്‍ക്കും തോണി ഉടമകള്‍ക്കും നോട്ടീസ് രേഖാമൂലം നല്‍കി. ആവശ്യപ്പെടുന്ന സമയത്ത് മുഴുവന്‍ രേഖകളും പൊലീസിന്‍െറ മുമ്പാകെ ഹാജരാക്കണമെന്നും അറിയിച്ചു. വ്യാഴാഴ്ച മുതല്‍ നമ്പറുകളില്ലാത്തതും അനധികൃതമായി മണല്‍വാരുന്നതുമായ തോണികള്‍ ശ്രദ്ധയില്‍പെട്ടാല്‍ കര്‍ശന നിയമനടപടി സ്വീകരിക്കുമെന്നും അറിയിച്ചു. മണല്‍മാഫിയകള്‍ നടത്തുന്ന മണല്‍കടത്ത് തടയുന്നതിന് രാത്രി ഏഴുമുതല്‍ രാവിലെ ഏഴുവരെ വളപട്ടണം പൊലീസിന്‍െറ നേതൃത്വത്തില്‍ കര്‍ശന പരിശോധനയുണ്ടാകുമെന്നും വളപട്ടണം സി.ഐ ടി.വി.ശ്രീജിത്തും എസ്.ഐ ശ്രീജിത്ത് കൊടേരിയും അറിയിച്ചു.