ഓടുന്ന ബൈക്കില്‍ മരം പൊട്ടിവീണു; വന്‍ ദുരന്തം ഒഴിവായി

ശ്രീകണ്ഠപുരം: സംസ്ഥാന പാതയില്‍ മടമ്പം തൃക്കടമ്പില്‍ ഓടിക്കൊണ്ടിരുന്ന ബൈക്കിനു മുകളിലേക്ക് കൂറ്റന്‍ മരക്കൊമ്പ് പൊട്ടിവീണ് യാത്രികന്‍ തലനാരിഴക്ക് രക്ഷപ്പെട്ടു. വെള്ളിയാഴ്ച ഉച്ചയോടെയായിരുന്നു സംഭവം. ശ്രീകണ്ഠപുരത്തുനിന്ന് ഇരിക്കൂര്‍ ഭാഗത്തേക്ക് പോവുകയായിരുന്ന കോട്ടൂരിലെ കിഴക്കയില്‍ ബിജു ജോസഫിന്‍െറ കെ.എല്‍ 59 കെ.364 ബൈക്കിനു മുകളിലേക്കാണ് മരം പൊട്ടിവീണത്. ബൈക്കിന്‍െറ മുന്‍ഭാഗത്തായി വൈസറിലും ടയറിലും പതിച്ച മരക്കൊമ്പ് റോഡിലേക്ക് വീഴുകയായിരുന്നു. ബിജു ജോസഫ് അദ്ഭുതകരമായി രക്ഷപ്പെട്ടു. ബൈക്കിന്‍െറ മുന്‍ഭാഗം തകര്‍ന്നു. നിരന്തരം വാഹനങ്ങള്‍ കടന്നുപോകുന്ന പാതയായതിനാല്‍ വന്‍ ദുരന്തമാണ് ഒഴിവായത്.