ശമ്പള പരിഷ്കരണം: ആറളം ഫാം തൊഴിലാളികള്‍ അനിശ്ചിതകാല സമരത്തിന്

ഇരിട്ടി: ശമ്പള പരിഷ്കരണം ആവശ്യപ്പെട്ട് ആറളം ഫാം തൊഴിലാളികള്‍ 21മുതല്‍ അനിശ്ചിതകാല സമരം നടത്തുമെന്ന് സംയുക്ത തൊഴിലാളി യൂനിയന്‍ നേതാക്കള്‍ അറിയിച്ചു. സര്‍ക്കാര്‍ നിയന്ത്രണത്തിലുള്ള മറ്റ് ഫാമുകളിലെ തൊഴിലാളികള്‍ക്ക് അനുവദിക്കുന്ന സേവന, വേതനം ലഭിക്കണമെന്നതാണ് ആറളത്തെ തൊഴിലാളികളുടെ പ്രധാന ആവശ്യം. മാസങ്ങള്‍ക്ക് മുമ്പ് തിരുവനന്തപുരത്ത് നടന്ന ചര്‍ച്ചയില്‍ അടുത്ത മന്ത്രിസഭാ യോഗത്തില്‍ തീരുമാനം ഉണ്ടാക്കാമെന്ന ഉറപ്പും ലംഘിക്കപ്പെട്ടതോടെയാണ് തൊഴിലാളികള്‍ സമരമാര്‍ഗത്തിലേക്ക് നീങ്ങുന്നത്. പരിഷ്കരിച്ച ശമ്പളം ലഭിക്കുന്നതുവരെ 2000 രൂപ ഇടക്കലാശ്വാസം പ്രഖ്യാപിച്ചിരുന്നു. 219 സ്ഥിരം തൊഴിലാളികളും 304 താല്‍ക്കാലിക തൊഴിലാളികളുമാണ് ഇവിടെയുള്ളത്. ഫാം സംസ്ഥാന സര്‍ക്കാറിന് വിട്ടുകൊടുക്കുമ്പോള്‍ 2004ല്‍ ലഭിച്ചുകൊണ്ടിരുന്ന വേതനമാണ് ഇപ്പോഴും ലഭിക്കുന്നത്. കൃഷി വകുപ്പുമായി ബന്ധപ്പെട്ട് ഫാമില്‍ വന്‍ അഴിമതികളാണ് നടക്കുന്നതെന്നും യൂനിയന്‍ നേതാക്കള്‍ ആരോപിച്ചു. ഫാമിന്‍െറ വരുമാനം വര്‍ധിപ്പിക്കാന്‍ പ്രഖ്യാപിച്ച പല പദ്ധതികളും അട്ടിമറിക്കപ്പെട്ടതായി നേതാക്കളായ കെ. വേലായുധന്‍, കെ.കെ. ജനാര്‍ദനന്‍, കെ.ടി. ജോസ്, ആര്‍.ബി. പിള്ള, ആന്‍റണി ജേക്കബ് എന്നിവര്‍ വാര്‍ത്താസമ്മേളനത്തില്‍ ആരോപിച്ചു.