വിജയ ബാങ്ക് കവര്‍ച്ച: തെളിവെടുപ്പ് വ്യാഴാഴ്ച

ചെറുവത്തൂര്‍: ചെറുവത്തൂര്‍ വിജയ ബാങ്ക് കവര്‍ച്ചക്കേസിലെ പ്രതികളെക്കൊണ്ട് വ്യാഴാഴ്ച തെളിവെടുപ്പ് നടത്തും. പ്രതികളെ വിട്ടുകിട്ടുന്നതിനായി പൊലീസ് കോടതിയില്‍ അപേക്ഷ നല്‍കി. വ്യാഴാഴ്ച രാവിലെ ചെറുവത്തൂര്‍ വിജയ ബാങ്ക്, സ്വര്‍ണം ഒളിപ്പിച്ച ചേരൂര്‍ക്കടവിലെ വീട്, ചെര്‍ക്കള ബേര്‍ക്കയിലെ പൊട്ടക്കിണര്‍ പരിസരം എന്നിവിടങ്ങളില്‍ തെളിവെടുപ്പിനായി കൊണ്ടുവരും. ജനങ്ങളുടെ പ്രതിഷേധം കണക്കിലെടുത്ത് കനത്ത പൊലീസ് കാവലിലായിരിക്കും തെളിവെടുപ്പ്. കവര്‍ച്ച നടത്താനുപയോഗിച്ച ആയുധങ്ങള്‍ എവിടെയാണ് സൂക്ഷിച്ചതെന്ന് കണ്ടത്തൊന്‍ കഴിഞ്ഞിട്ടില്ല. ഡ്രില്ലിങ് മെഷീനും കവര്‍ച്ചക്ക് ഉപയോഗിച്ച ഉപകരണങ്ങളും തേജസ്വിനി പുഴയില്‍ ഉപേക്ഷിച്ചുവെന്ന നിഗമനത്തിലാണ് പൊലീസ്. ഇതിനായി മുങ്ങല്‍ വിദഗ്ധര്‍ പരിശോധന നടത്തും. എന്നാല്‍, പൊലീസ് നായ ഓടിയത്തെിയ ചെറുവത്തൂര്‍ ഗവ. വെല്‍ഫെയര്‍ യു.പി സ്കൂള്‍ പരിസരത്തും കവര്‍ച്ചക്ക് ഉപയോഗിച്ച ഉപകരണങ്ങള്‍ ഉപേക്ഷിച്ചിട്ടുണ്ടോ എന്നും പരിശോധിക്കും. മുറി വാടകക്കെടുത്ത് തൊട്ടടുത്ത കടക്കാരെയും നാട്ടുകാരെയും കബളിപ്പിച്ച സുലൈമാനെയും ചെറുവത്തൂരിലത്തെിക്കും. ഇസ്മയില്‍ എന്ന പേരില്‍ പരിചയപ്പെടുത്തിയ ഇയാള്‍ ചെറുവത്തൂരില്‍ മുറികള്‍ മറ്റൊരാളുടെ പേരിലാണ് വാടകക്കെടുത്തത്. ആറ് പ്രതികളെയാണ് കോടതി റിമാന്‍ഡ് ചെയ്തത്. കേസിലെ അഞ്ചാം പ്രതിയും കുടക് സ്വദേശിയുമായ അബ്ദുല്‍അഷ്റഫിനെ പിടികൂടാനായിട്ടില്ല. സംഭവവുമായി ബന്ധപ്പെട്ട് ഇടുക്കി സ്വദേശി രാജേഷ് മുരളി, കാഞ്ഞങ്ങാട് കൊളവയല്‍ സ്വദേശി അബ്ദുറസാഖ്, അബ്ദുല്ലത്തീഫ്, കുശാല്‍നഗര്‍ ബൈത്തനപള്ളിയിലെ സുലൈമാന്‍, കാഞ്ഞങ്ങാട് ബല്ലയിലെ മുബശീര്‍, ചെങ്കള നാലാംമൈല്‍ ബേര്‍ക്കയിലെ അബ്ദുല്‍ഖാദര്‍ എന്ന മനാഫ് എന്നിവരാണ് റിമാന്‍ഡിലുള്ളത്.