പട്ടീല്‍- പെടയങ്ങോട് മേഖലയില്‍ കാട്ടുപന്നി-കുരങ്ങ് ശല്യം രൂക്ഷം

ഇരിക്കൂര്‍: പട്ടീല്‍-പെടയങ്ങോട് കുണ്ടേരിവയല്‍ മേഖലകളില്‍ കാട്ടുപന്നി-കുരങ്ങ് ശല്യം രൂക്ഷമാകുന്നു. കാട്ടുപന്നിക്കൂട്ടങ്ങളും വാനരന്മാരും കാര്‍ഷിക മേഖലകളില്‍ ഇറങ്ങി വന്‍തോതില്‍ കൃഷി നശിപ്പിക്കുകയാണ്. കുണ്ടേരിവയലിലെ വീട്ടുമുറ്റങ്ങളില്‍ പോലും കുരങ്ങുകള്‍ എത്തിയതോടെ വീട്ടുകാരും പരിഭ്രാന്തിയിലായി. വീട്ടുമുറ്റത്തെ കുരങ്ങുകൂട്ടത്തെ കണ്ട് പരിഭ്രാന്തിയിലായ വീട്ടുടമ സുബൈദ (45) ഓടുമ്പോള്‍ വീണ് പരിക്കേറ്റു. പട്ടീലിലെ കെ.ടി. അശ്റഫിന്‍െറ വീട്ടുപറമ്പിലെ നൂറോളം ചേമ്പുകള്‍ കാട്ടുപന്നികള്‍ കഴിഞ്ഞദിവസം നശിപ്പിച്ചു. സമീപത്തെ എന്‍.പി. സൗദയുടെ കപ്പ, ചേമ്പ് കൃഷികളും നശിപ്പിച്ചു. പെടയങ്ങോട് കുണ്ടേരിവയലിലെ നിരവധി പറമ്പുകളിലെ തെങ്ങില്‍ കയറിയ കുരങ്ങുകള്‍ തേങ്ങയും കരിക്കും നശിപ്പിച്ചു. പെരുമണ്ണിലെ സെഞ്ച്വറി ഗ്രൂപ് തോട്ടത്തിലും ഇളനീരും കരിക്കുകളും നശിപ്പിച്ചു.