അരിയിട്ട് വാഴിക്കല്‍ ചടങ്ങ് നടത്തി

നീലേശ്വരം: രാജവംശത്തിലെ നാലും അഞ്ചും കൂര്‍ രാജാക്കന്മാരെ അരിയിട്ട് വാഴിച്ചു. നാലാംകൂര്‍ രാജാവ് കിണാവൂര്‍ കോവിലകത്തെ കെ.സി. രവിവര്‍മ രാജയും അഞ്ചാംകൂര്‍ രാജാവ് തെക്കെ കോവിലകത്തെ ടി.സി. ഉദയവര്‍മ രാജയുമാണ്. നിയുക്ത ഒന്നാംകൂര്‍ രാജാവ് ടി.സി. കേരളവര്‍മരാജ അടുത്തിടെ മരിച്ചിരുന്നു. ഇതോടെ നിലവിലെ രണ്ടാംകൂര്‍ രാജാവ് കിണാവൂര്‍ കോവിലകത്തെ കെ.സി. രാമവര്‍മ രാജ ഒന്നാംകൂറായി ചുമതലയേറ്റു. രാജവംശത്തിന്‍െറ നിയന്ത്രണത്തിലുള്ള തളിയില്‍ നീലകണ്ഠേശ്വര ക്ഷേത്രം, പടിഞ്ഞാറ്റംകൊഴുവല്‍ കോട്ടം വേട്ടക്കൊരുമകന്‍ ക്ഷേത്രം എന്നിവയുടെ ട്രസ്റ്റി സ്ഥാനവും രാജാസ് ഹയര്‍സെക്കന്‍ഡറി സ്കൂള്‍, അച്ചാംതുരുത്തി രാജാസ് എല്‍.പി സ്കൂള്‍ എന്നിവയുടെ മാനേജര്‍ സ്ഥാനവും അഞ്ചാംകൂര്‍ രാജാവ് ടി.സി. ഉദയവര്‍മക്കാണ്. മെക്കാനിക്കല്‍ എന്‍ജിനീയര്‍ ബിരുദധാരിയായ ഉദയവര്‍മരാജ തിരുവനന്തപുരം സിഡ്കോ ഹെഡ് ഓഫിസില്‍ പി.ആര്‍.ഒ അസി. ജനറല്‍ മാനേജര്‍ തസ്തികയില്‍നിന്ന് വിരമിച്ചു. മുംബൈ അമ്പള്‍നാലിലെ ഇന്ത്യന്‍ ഓര്‍ഡിനന്‍സ് ഫാക്ടറിയില്‍ അസി. ഫാക്ടറി മാനേജറായി വിരമിച്ചയാളാണ് കെ.സി. രാമവര്‍മരാജ. രണ്ടാംകൂര്‍ രാജാവ് കെ.സി. കേരളവര്‍മരാജ, മൂന്നാംകൂര്‍ രാജാവ് എം.സി. രാമവര്‍മരാജ എന്നിവര്‍ പിന്നീട് ചുമതലയേല്‍ക്കും.