തെരുവുനായ ശല്യം : തദ്ദേശ വകുപ്പിനോട് മനുഷ്യാവകാശ കമീഷന്‍ വിശദീകരണം തേടി

കണ്ണൂര്‍: ആക്രമണകാരികളായ തെരുവുനായ്ക്കളില്‍നിന്ന് പൊതുജനങ്ങളെ സംരക്ഷിക്കാന്‍ എന്തൊക്കെ നടപടികള്‍ സ്വീകരിക്കുന്നുണ്ടെന്ന് തദ്ദേശ സ്വയംഭരണ വകുപ്പ് സെക്രട്ടറിയോട് സംസ്ഥാന മനുഷ്യാവകാശ കമീഷന്‍ വിശദീകരണം തേടി. തെരുവുനായ്ക്കളുടെ ആക്രമണത്തില്‍ പരിക്കേറ്റവരുടെ സഹായത്തിനായി സ്വീകരിച്ച നടപടികള്‍ വിശദീകരിക്കാന്‍ കണ്ണൂര്‍ ജില്ലാ കലക്ടറോടും അഴീക്കോട് ഗ്രാമപഞ്ചായത്ത് സെക്രട്ടറിയോടും കമീഷന്‍ ആവശ്യപ്പെട്ടു. a അഴീക്കോട് ഗ്രാമപഞ്ചായത്തില്‍ വീട്ടുമുറ്റത്ത് കളിച്ചുകൊണ്ടിരുന്ന കുട്ടികളടക്കം നിരവധിപേര്‍ക്ക് തെരുവുനായ്ക്കളുടെ കടിയേറ്റ സംഭവത്തില്‍ സ്വമേധയാ കേസെടുത്താണ് മനുഷ്യാവകാശ കമീഷന്‍ അംഗം അഡ്വ. കെ. മോഹന്‍ കുമാര്‍ കണ്ണൂര്‍ ഗവ. ഗെസ്റ്റ് ഹൗസില്‍ നടത്തിയ സിറ്റിങ്ങില്‍ ഉത്തരവിട്ടത്. കേന്ദ്രസര്‍ക്കാര്‍ നടപ്പാക്കിയ ഒറ്റപ്പെണ്‍കുട്ടി സ്കോളര്‍ഷിപ് പദ്ധതി സംസ്ഥാന സിലബസ് സ്കൂളുകളിലും നടപ്പാക്കണമെന്ന ആവശ്യത്തില്‍ പൊതുവിദ്യാഭ്യാസ സെക്രട്ടറിയില്‍നിന്ന് വിശദീകരണം തേടാനും കമീഷന്‍ നിര്‍ദേശിച്ചു. സംസ്ഥാനത്തെ ടിമ്പര്‍ തൊഴിലാളികള്‍ക്ക് മിനിമം കൂലി നടപ്പാക്കണമെന്ന ആവശ്യത്തില്‍ തൊഴില്‍ വകുപ്പ് സെക്രട്ടറിയില്‍നിന്ന് കാര്‍ഷിക വായ്പകള്‍ക്ക് ഇന്‍ഷുറന്‍സ് പരിരക്ഷ ലഭ്യമാക്കുക, ധനകാര്യസ്ഥാപനങ്ങളില്‍ വായ്പാ പലിശനിരക്ക് പ്രദര്‍ശിപ്പിക്കുക എന്നീ ആവശ്യത്തില്‍ ധനകാര്യ സെക്രട്ടറിയില്‍നിന്ന് റിപ്പോര്‍ട്ട് തേടും. ഇരിട്ടി പൊലീസ് സ്റ്റേഷനു മുന്നില്‍ നിര്‍ത്തിയിട്ട വാഹനങ്ങള്‍ പരിസ്ഥിതി മലിനീകരണത്തിന് ഇടയാക്കുന്നുവെന്ന പരാതിയില്‍ ജില്ലാ കലക്ടറോടും ജില്ലാ പൊലീസ് മേധാവിയോടും റിപ്പോര്‍ട്ട് ആവശ്യപ്പെട്ടു. ആകെ 110 പരാതികളാണ് സിറ്റിങ്ങില്‍ പരിഗണിച്ചത്.