സാമുദായിക, വര്‍ഗീയ ധ്രുവീകരണത്തിനെതിരെ പോരാടണം –ശാക്കിര്‍ വേളം

കണ്ണൂര്‍: സാമുദായിക, വര്‍ഗീയ ധ്രുവീകരണത്തിനെതിരെയുള്ള പ്രവര്‍ത്തനം ശക്തിപ്പെടുത്തണമെന്ന് സോളിഡാരിറ്റി സംസ്ഥാന പ്രസിഡന്‍റ് ടി. ശാക്കിര്‍ വേളം. സംഘ്പരിവാര്‍ ശക്തികള്‍ രാഷ്ട്രീയ മേധാവിത്വം പുലര്‍ത്തുന്ന ഈ കാലത്ത് സാമൂഹിക ബന്ധങ്ങളിലുണ്ടാക്കുന്ന വിദ്വേഷത്തിനും അസഹിഷ്ണുതക്കുമെതിരെ മാനവിക മൂല്യങ്ങളിലൂന്നി പ്രവര്‍ത്തിക്കണമെന്നും അദ്ദേഹം പറഞ്ഞു. സോളിഡാരിറ്റി ജില്ലാ പ്രവര്‍ത്തക കണ്‍വെന്‍ഷന്‍ ഉദ്ഘാടനം ചെയ്യുകയായിരുന്നു അദ്ദേഹം. സോളിഡാരിറ്റി ജില്ലാ പ്രസിഡന്‍റ് ഫിറോസ് ചക്കരക്കല്ല് അധ്യക്ഷത വഹിച്ചു. സംസ്ഥാന സമിതിയംഗം ഡോ. ഉമര്‍ സാദിഖ്, ജമാഅത്തെ ഇസ്ലാമി ജില്ലാ പ്രസിഡന്‍റ് സി.പി. ഹാരിസ് എന്നിവര്‍ സംസാരിച്ചു. ജില്ലാ സെക്രട്ടറി തസ്നീം മട്ടന്നൂര്‍ സ്വാഗതവും റാഷിദ് തലശ്ശേരി ഖുര്‍ആന്‍ ക്ളാസും മുസദ്ദിഖ് നന്ദിയും പറഞ്ഞു.