നഗരത്തില്‍ പൈപ്പ് പൊട്ടല്‍ തുടര്‍ക്കഥ; വീണ്ടും കുടിവെള്ളം മുട്ടി

തൊടുപുഴ: നഗരത്തില്‍ പൈപ്പ് പൊട്ടല്‍ തുടര്‍ക്കഥയായതോടെ ജനം ദുരിതത്തില്‍. നാലു ദിവസത്തിനിടെ പ്രധാന പൈപ്പില്‍ രണ്ടുതവണയാണ് പൊട്ടലുണ്ടായത്. ഇതേതുടര്‍ന്ന് പമ്പിങ് അടക്കം നിര്‍ത്തിവെക്കേണ്ട സാഹചര്യമാണ് ഉണ്ടായത്. കഴിഞ്ഞയാഴ്ച പൈപ്പ് പൊട്ടിയതിനെ തുടര്‍ന്ന് രണ്ടു ദിവസമാണ് പമ്പിങ് മുടങ്ങിയത്. ഇതേതുടര്‍ന്ന് തൊടുപുഴയിലും സമീപ പഞ്ചായത്തുകളിലും കുടിവെള്ളം മുടങ്ങിയിരുന്നു. പൈപ്പ് പുന$സ്ഥാപിച്ച് രണ്ടു ദിവസത്തിനകം വീണ്ടും അതേ സ്ഥലത്ത് ചോര്‍ച്ചയുണ്ടായതിനെ തുടര്‍ന്ന് വീണ്ടും പമ്പിങ് നിര്‍ത്തിവെക്കേണ്ട സാഹചര്യമുണ്ടായി. ഞായറാഴ്ച നഗരത്തില്‍ കുടിവെള്ളം മുടങ്ങിയ നിലയിലായിരുന്നു. ചോര്‍ച്ച പരിഹരിക്കാന്‍ ശനിയാഴ്ച രാത്രിയോടെയാണ് അറ്റകുറ്റപ്പണി ആരംഭിച്ചത്. ഞായറാഴ്ച വൈകീട്ടോടെ തകരാര്‍ പരിഹരിച്ചതായും തിങ്കളാഴ്ച പമ്പിങ് പുനരാരംഭിക്കുമെന്നും വാട്ടര്‍ അതോറിറ്റി അധികൃതര്‍ അറിയിച്ചു.